Variety უკვე მეორედ წერს საქართველოზე, როგორც კინოინდუსტრიის ყველაზე ცხელ წერტილზე.

სტატიაში ნათქვამია, რომ საქართველომ, რომელიც აერთიანებს კავკასიის მთებსა და შავ ზღვას, გასულ წელს კინოსამყაროს თავი მიმზიდველი და საინტერესო ადგილებით დაამახსოვრა.

"სანამ ფილმის გადაღებებისთვის ადგილის ძებნას დაიწყებთ, გახსოვდეთ რომ საქართველო ამისთვის საუკეთესო ადგილია", - წერს გამოცემა.

Variety-ის სტატიაში აღნიშნულია, რომ ქვეყანა ერთდროულად აერთიანებს როგორც თანამედროვე ნაგებობს, ასევე, არ კარგავს ძველ, ისტორიულ ძეგლებს, რაც მათი აზრით, კინოინდუსტრიაში მომუშავე ადამიანებისთვის ძალიან საინტერესოა გამოცდილება იქნებოდა.

ჟურნალისტი დაინტერესდა თურქი რეჟისორის, თოლგა ორნეკის გამოცდილებითაც, რომელიც საქართველოში სერიალს იღებს.

"ჩვენი სერიალი რამდენიმე კულტურაზეა და ყველაფერი ის, რაც ჩვენ გვჭირდებოდა აქ დაგვხვდა", - ამბობს თოლგა.

ამ თემაზე მასალა Variety-მ პირველად გასულ წელს მოამზადა.

"მთიანი ქვეყანა, რომელიც აზიისა და ევროპის გზაგასაყარზე მდებარეობს – სტუმარს განსხვავებული კულტურების ნაზავსა და უნიკალურ ხედებს სთავაზობს. საქართველო ნამდვილი აღმოჩენაა და მისით საერთაშორისო დონის კომპანიები ინტერესდებიან. ქართულ ბაზარზე არსებული საკმაოდ დაბალი ფასები კი ქვეყანას კიდევ უფრო მიმზიდველს ხდის", - წერდა გამოცემა.

სტატიაში აღნიშნულია ისიც, რომ საქართველო იყო პირველი ქვეყანა, რომელმაც შავი ზღვის რეგიონის მასშტაბით შეიმუშავა წამახალისებელი პროგრამები კონკრეტული ინდუსტრიების განვითარებისა და სახელმწიფოს მხრიდან სხვადასხვა სფეროების ხელშეწყობისათვის.

შესაბამისად, საქართველოში გადაღებების წარმოება სასიამოვნოსთან ერთად მომგებიანი პროცესიც გახდა. საერთაშორისო პროდიუსერებს საშუალება მიეცათ პროგრამის, გადაიღე საქართველოში, ფარგლებში წამახალისებელი, ე.წ. Cash Rebate მექანიზმის დახმარებით აინაზღაურონ გადაღებებზე გაწეული ხარჯების 20%, ხოლო ე.წ. კულტურული ტესტის გავლის შემთხვევაში კი დამატებით 5% დაიბრუნონ უკან, რაც მაგალითისთვის ადგილობრივი მსახიობების წამყვან როლებზე დამტკიცებას, ქართული ღირსშესანიშნაობების წარმოჩენასა და სხვა კულტურულ შტრიხებზე ყურადღების გამახვილებას მოიაზრებს.

ეს ყველაფერი კი, სხვადასხვა საპროდიუსერო კომპანიების არსებობასთან ერთად, რომლებიც დაინტერესებულ მხარეებს მომსახურების ფართო სპექტრს, ხმის, განათებისა და სხვა მაღალი დონის აპარატურის სახით, სთავაზობენ, საქართველოს საკმაოდ მიმზიდველს ხდის და პროდიუსერების მაღალ ინტერესს იწვევს ბოლივუდიდან და ჰოლივუდიდანაც კი.