FIFA-ს მსოფლიო ჩემპიონატის თასი უკვე თბილისშია. თასის დახვედრის ცერემონია თბილისის საერთაშორისო აეროპორტში გაიმართა და მას მედიის წარმომადგენლები და ოფიციალური პირები ესწრებოდნენ. მათ შორის იყო თბილისის მერი კახა კალაძე და პარლამენტარი მიხეილ ყაველაშვილი.

ორგანიზატორებმა მსოფლიო ჩემპიონატის თასი აეროპორტიდან თბილისი მოლში გადაიტანეს, სადაც მისი ნახვა 18:00 სთ-მდე ნებისმიერ მსურველს შეუძლია.

მსოფლიო ჩემპიონატის თასი საქართველოში კოკა-კოლამ თბილისის მერიასთან და ფეხბურთის ფედერაციასთან თანამშრომლობით ჩამოიტანა. თასი საპატიო სტუმარმა, კრისტიან კარამბემ ჩამოიტანა. კარამბე 1992-2002 წლებში საფრანგეთის ნაკრებში თამაშობდა და 1998 წელს გუნდთან ერთად მსოფლიო ჩემპიონიც გახდა.

FIFA-ს მსოფლიო თასის ტური კოკა-კოლამ 2017 წლის სექტემბერს დაიწყო. ტური პლანეტის 6 კონტინენტის 50-ზე მეტ ქვეყანას მოიცავს და ცხრა თვის განმავლობაში 126 000 კილომეტრს გაივლის.