თბილისის სახელმწიფო უნივერსიტეტის, სოციალურ და პოლიტიკურ მეცნიერებათა ფაკულტეტის დეკანი, თამარ დოლბაია აუდიტორია 115-ის წევრებს შეხვდა, რომელიც უნივერსიტეტის იუბილესადმი მიძღვნილ ღონისძიებას აპროტესტებენ.

დოლბაიამ სტუდენტებს თხოვნით მიმართა, დღეს პატივი სცენ მას და უნივერსიტეტს აქცია ხვალისთვის გადადონ: "მეექვსე კორპუსი რო აიღეთ მაშინ გითხარით რამე? მე ამ წუთში გთავაზობთ იმას, რომ პატივი ვცეთ უნივერსიტეტს".

დოლბაიამ სტუდენტებს განუმარტა, რომ დღევანდელი ღონისძიების ჩაშლას, ჯობია აქცია სხვა დროისთვის გადაიტანონ. მისი თქმით, "არის ჟამი ქვების შეგროვების და არის ჟამი ქვების სროლის".

მას შემდეგ, რაც სტუდენტებმა უარი განაცხადეს დოლბაიამ მათ უთხრა, რომ არც თვითონ შევიდოდა ღონისძიებაზე და სოლიდარობის ნიშნად გარეთ დარჩებოდა. On.ge-ს კითხვას გამოხატავდა თუ არა ამით სოლიდარობას და იზიარებდა თუ არა სტუდენტების პოზიციას, მან პასუხი არ გასცა.

ამ წუთებში თსუ-ის საიუბილეო ღონისძიება ხმაურის ფონზე მიმდინარეობს. დაცვის წევრებს სააქტო დარბაზის შესასვლელი აქვთ გადაკეტილი. ღონისძიებაზე დასწრება მხოლოდ მიწვეულ სტუმრებს შეუძლიათ.