ნაციონალური მოძრაობის წევრი, რომან გოცირიძე, აცხადებს, რომ სამინისტრომ პროპაგანდისტული მიდგომის ნაცვლად, დანაშაულს უნდა ებრძოლოს. ასე გამოეხმაურა პარლამენტარი შინაგან საქმეთა სამინისტროს მიერთებას აქციაზე "არა ჩადებას".

მისი თქმით, რიგითი პოლიციელი დამოუკიდებელ გადაწყვეტილებებს არ იღებს და ჩადებები სისტემური პრობლემაა.

"ეს არის ძალიან ცინიკური განცხადება, ვინაიდან ჩადებას ვინ ახორციელებს ძალიან კარგად არის ცნობილი. ამიტომ, არ უნდა კამპანიური და პროპაგანდისტული მიდგომა, არამედ საჭიროა ბრძოლა ამ დანაშაულის წინააღმდეგ", - განაცხადა გოცირიძემ On.ge-სთან საუბრისას.

გოცირიძის ამბობს, რომ სამინისტროს მხრიდან ამ აქციაზე შეერთება სასაცილოა, რადგან ისინი ჩადებების ფაქტს არ აღიარებდნენ და შესაბამისი რეაგირება არ ჰქონიათ. მისი თქმით, სამინისტროში ცვლილებებს მაშინ დაიჯერებს, როდესაც აღიძვრება სისხლის სამართლის საქმე დამნაშავეების წინააღმდეგ :

"თუ ისინი გამოდიან ამ კამპანიის მხარდასაჭერად, ამ ლოზუნგით და თუ უნდათ, რომ საზოგადოებამ ირწმუნოს ამ გადაწყვეტილების გულწრფელობა, მაშინ ჩვენ უნდა ვნახოთ ძალიან სწრაფად დასჯილი ის ადამიანები, რომლებიც ახორციელებენ ჩადებას, ის პოლიციელები, რომლებიც მონაწილეობდნენ ამ პროცესში და არამარტო განმახორციელებელი. რიგითი პოლიციელი ამას არ აკეთებს, მას ყავს ვიღაც ზევიდან, ვისი მითითებითაც და დავალებითაც კეთდება და ეს უკვე სისტემური პრობლემაა, რადგან ძალოვანი სტრუქტურები ეს არის მკაცრად იერარქიული სტრუქტურა და რიგითი არასდროს ღებულობს გადაწვეტილებას."

დღეს, დაახლოებით ორი საათის წინ, შინაგან საქმეთა სამინისტროს ფეისბუკის ოფიციალურ გვერდზე წარწერა "არა ჩადებას!" გაჩნდა. უწყების პრესსამსახურში On.ge-ს უთხრეს, რომ ამით აქციას "არა ჩადებას!" შეუერთდნენ.

უწყების პრესსამსახურში, კითხვაზე - ეს ნიშნავს, თუ არა იმას, რომ "ჩადებები" ხდება - ამბობენ, რომ "ამ სტატუსით ყველაფერი ნათქვამია".