"მე დღეს ყველაფერი მინდა დავიწყო თავიდან",- ევროპული საქართველოს ლიდერი გიგი უგულავა პარლამენტის შუალედურ არჩევნებში ხონისა და ვანი მაჟორიტარულ ოლქში იყრის კენჭს.

ხონისა და ვანის ოლქში შუალედური არჩევნები 2018 წლის აპრილში ჩატარდება, ვინაიდან ქართული ოცნების დეპუტატმა გრიგოლ ლილუაშვილმა სახელმწიფო უსაფრთხოების სამსახურში ვახტანგ გომელაურის მოადგილის პოსტზე გადაინაცვლა. ის ხონისა და ვანის მაჟორიტარი 2016 წლის საპარლამენტო არჩევნების შედეგად გახდა.

დღეს, 4 თებერვალს გამართულ რიგგარეშე ყრილობაზე პარტიის ლიდერმა, გიგი უგულავამ სიტყვით გამოსვლისას განაცხადა, რომ მან ეს გამოწვევა მიიღო და მისივე თქმით, ხონსა და ვანს აქვს პრივილეგია იყოს "ცვლილებების მედროშე და ავანგარდი":

"ამ საყოველთაო უიმედობის ფონზე ხონელებსა და ვანელებს აქვთ შანსი საქართველოს მდორე პოლიტიკური ცხოვრების ჩარხი შეაბრუნონ და ქვეყანა პროგრესისკენ მიმართონ".

გიგი უგულავას თქმით, თუკი ისინი ხონსა და ვანში გაიმარჯვებენ, ოპოზიცია გაიმარჯვებს საპრეზიდენტო არჩევნებზეც:

"თუ ვიქნებით კონსოლიდირებული, 2018 წელი დიდი შემობრუნებისა და იმედის წლად შეიძლება ვაქციოთ".

უგულავამ თანამშრომლობა შესთავაზა სხვა ოპოზიციურ პარტიებსაც:

"ევროპული საქართველო საუკეთესო პლათფორმაა ოპოზიციისთვის, რადგან ხონსა და ვანში ჩვენ, ოპოზიციურ პარტიათა შორის, გასულ არჩევნებზე საუკეთესო მაჩვენებელი გვქონდა. ვაქციოთ ეს არჩევნები თანამშრომლობის და არა დაპირისპირების არეალად".

დღეს, 4 თებერვალს პარტია ევროპულმა საქართველომ მეხუთე რიგგარეშე ყრილობა გამართა. ყრილობაზე პოლიტსაბჭოს ახალი შემადგენლობა დაამტკიცეს, რომელიც თვითმმართველობის არჩევნების შედეგების მიხედვით ჩამოყალიბდა. პარტია ევროპულმა საქართველომ პოლიტსაბჭოს თავმჯდომარედ გიგა ბოკერია აირჩია.