დღეს აჭარის მთავრობის ყოფილი მეთაური, ლევან ვარშალომიძე საქართველოში დაბრუნდა. სარფში მას მხარდამჭერები დახვდნენ, მათ შორის მიხეილ სააკშვილის მეუღლე სანდრა რულოვსიც. ერთ-ერთმა მოქალაქემ კი პროტესტის ნიშნად ვარშალომიძეს ფეხსაცმელი ესროლა, რისთვისაც ის დააკავეს.

როგორც On.ge-ს შსს-ში განუმარტეს, მოქალაქე ადმინისტრაციული სამართალდარღვევათა კოდექსის 166-ე მუხლით დააკავეს, რაც წვრილმან ხულიგნობას გულისხმობს.

ვარშალომიძე აჭარის ავტონომიური რესპუბლიკის უმაღლესი საბჭოს არჩევნებში, რომელიც 8 ოქტომბერს გაიმართება, ნაციონალური მოძრაობის სიის პირველი ნომერი იქნება. დღეს კი მან წინასაარჩევნო კამპანიის დაწყება დააანონსა.

ის ასევე არ გამორიცხავს, რომ საქართველოში დაბრუნების შემდეგ მისი დაკითხვები გაგრძელდეს თანამდებობრივი უფლებამოსილების ბოროტად გამოყენებასთან და კულტურული მემკვიდრეობის დაზიანების ფაქტებთან დაკავშირებით. აღსანიშნავია, რომ ვარშალომიძეს არც ერთ საქმეზე ბრალი წარდგენილი არ აქვს.

მას შემდეგ, რაც ვარშალომიძემ სარფის საზღვარი გადმოკვეთა, მის მხარდასაჭერად შეკრებილ ადამიანებს გვერდში დგომისთვის მადლობა გადაუხადა.