თემირლან მაჩალიკაშვილის ოჯახი პროკურატურას თბილისში შეხვედრაზე დათანხმდა. მაჩალიკაშვილის ოჯახი მთავარ პროკურორთან შეხვედრას პანკისში მოითხოვდა, თუმცა, მათ შეხვედრა თბილისში შესთავაზეს.

მალხაზ მაჩალიკაშვილის თქმით შეხვედრაზე ძმასთან და ადვოკატებთან ერთად წავა:

"გადავწყვიტე, ხვალ ჩავიდე თბილისში. რახან ეს არ ამოვიდა ხეობაში, არ გაითვალისწინა პანკისის ხეობის ქისტების მოთხოვნა, გადავწყვიტე რომ ჩავიდე. ისევ რაღაც, მაგათ კოზირი რომ არ ქონდეთ ხელში და რაღაც რეკლამად რომ არ გამოიყენონ."

უწყების თქმით, მაჩალიკაშვილის ოჯახს ისინი მთავარ პროკუროორთან, ირაკლი შოთაძესთან და საგამოძიებო ჯგუფთან ერთად ხვალ, პირველ საათზე მთავარ პროკურატურაში შეხვდებიან.

ოჯახი ითხოვს, რომ მათ მაჩალიკაშვილის მკვლელობის საქმეზე მიმდინარე გამოძიებიების შესახებ ინფორმაცია გააცნონ.

თემირლან მაჩალიკაშვილის საქმე

19 წლის თემირლან მაჩალიკაშვილი, რომელიც პანკისის ხეობაში სპეცოპერაციისას სპეცრაზმელმა თავში დაჭრა, 2017 წლის 10 იანვარს ორკვირიანი კომატოზური მდგომარეობის შემდეგ გარდაიცვალა.

26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.

აღნიშნული ინციდენტის გამო, სპეციალური დანიშნულების რაზმის წევრების მხრიდან სამსახურებრივი უფლებამოსილების შესაძლო გადამეტების ფაქტზე პროკურატურა გამოძიებას აწარმოებს.

სახელმწიფო უსაფრთხოების სამსახურის ინფორმაციით, თემირლან მაჩალიკაშვილსა და 26 დეკემბერს დაკავებულებს კავშირი ჰქონდათ ისნის სპეცოპერაციისას ლიკვიდირებულებთან.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია. სუს-ის ცნობით, აღნიშნული პირები ტერორისტულ აქტებს გეგმავდნენ.