ქართულ-რუსული არაფორმალური დიალოგის ფარგლებში, 31 იანვარს, პრაღაში, ზურაბ აბაშიძისა და გრიგორი კარასინის შეხვედრა გაიმართა. ინფორმაციას მთავრობის ადმინისტრაცია ავრცელებს.

უწყების ინფორმაციით, ზურაბ აბაშიძემ ყურადღება გაამახვილა აფხაზეთსა და ცხინვალის რეგიონში, ასევე საოკუპაციო ხაზზე მიმდინარე პროცესებზე. კერძოდ, ცხინვალის რეგიონის უკანონო სამხედრო დაჯგუფებების, რუსეთის შეიარაღებული ძალების შემადგენლობაში გაერთიანების თაობაზე, ე.წ. შეთანხმების რატიფიცირებას რუსეთის სახელმწიფო სათათბიროს მიერ. პრაღის ფორმატი არ ითვალისწინებს უსაფრთხოებისა და საქართველოს ოკუპირებულ ტერიტორიებთან დაკავშირებული საკითხების განხილვას.

პრაღის შეხვედრის დღის წესრიგით გათვალისწინებული საკითხებიდან განიხილეს, „საქართველოს მთავრობასა და რუსეთის ფედერაციის მთავრობას შორის საბაჟო ადმინისტრირებისა და სასაქონლო ვაჭრობის მონიტორინგის მექანიზმებთან დაკავშირებული ძირითადი პრინციპების შესახებ" 2011 წლის შეთანხმების იმპლემენტაციასთან დაკავშირებული საკითხები.

ადმინისტრაციის ინფორმაციით, აღნიშნულ საკითხზე საუბრისას გამოიკვეთა პოზიციათა სერიოზული სხვაობა. რუსეთის მხარე ინტერპრეტაციას უკეთებს შეთანხმების რიგ არსებით დებულებას, რაც მნიშვნელოვან საფრთხეს უქმნის აღნიშნული ხელშეკრულებით გათვალისწინებული ვალდებულებების შესაბამის იმპლემენტაციას. ვინაიდან, რუსეთში ოფიციალურ დონეზე გაკეთდა განცხადებები, რომლებიც ცალსახად ეწინააღმდეგება აღნიშნული შეთანხმების პრინციპებსა და არსს.

აბაშიძე-კარასინის შეხვედრა 2008 წლის აგვისტოს ომის შემდეგ დიალოგის პირველი მცდელობაა საქართველო-რუსეთის ოფიციალურ პირებს შორის და ის 2012 წლიდან ყოველ 4 თვეში ერთხელ იმართება.

საქართველოსა და რუსეთს შორის დიპლომატიური ურთიერთობა 2008 წლის აგვისტოს რუსეთ-საქართველოს ომის შემდეგ შეწყდა.

გაიგეთ მეტი: რატომ არის აბაშიძე-კარასინის ფორმატის არსებობის საჭიროება ბუნდოვანი