თბილისში, რუსთაველის გამზირის 12 ნომერში კიდევ ერთი სასტუმრო Four Season-ის მშენებლობა იგეგმება. არქიტექტურს სამსახურმა წინასწარი თანხმობა უკვე გასცა. კულტურული მემკვიდრეობის დაცვის საბჭოს ექვსივე წევრმა სასტუმროს ესკიზს დადებითი შეფასება მისცა.

ხელოვნებათმცოდნე თამარა ამაშუკელის თქმით, ამ ადგილას ახალი შენობის აშენება პრობლემურია. როგორც მან On.ge-სთან საუბარში აღნიშნა, არსებული პროექტი, რომელიც ჯერ დამტკიცებული არ არის, საკმაოდ აგრესიული არქიტექტურით არღვევს იმ ისტორიულ განაშენიანებას, რომელიც რუსთაველის გამზირს აქვს.

"რამდენი ახალი მშენებლობაც იყო რუსთაველის გამზიზრზე, არაფერი არ შესძინა რუსთაველს, პირიქით, ძალიან ბევრი დააკლო. ამის მაგალითია იმელის უკან მშენებლობა, თუნდაც მხატვრის სახლის ადგილას არსებული მშნებელობა".

ამაშუკელის განმარტებით, შენობა 30-იან წლებშია აშენებული და თავიდან იყო კონტრუქტივისტული არქიტექტურის ერთ-ერთი ნიმუში. შემდგომში, როდესაც აიკრძალა ეს სტილი, როგორც საბჭოთა სახელმწიფოსთვის შეუფერებელი, გადაწყდა, რომ მისთვის შეეცვალათ ფასადი და 50-იანებში მას ფასადი შეუცვალეს. მისი თქმით, დედაქალაქის მთავარ გამზირზე ახალ მშენებლობებსა და რესტავრაციებს ფაქიზი მიდგომა სჭირდება:

"შენობას აქვს თავისი არქიტექტურული ღირებულება, განსაკუთრებით აინტერესოა მისი ისტორიული ღირებულება, როგორც პოლიტიკურ ცვლილებებთან ერთად არსებული სტილების ცვლილება. თუ როგორი პოლიტკა ჰქონდა საბჭოთა კავშირს არქიტექტურასთან მიმართებით".

ამაშუკელის თქმით, შენობა საკმაოდ დიდია და აბსოლუტურად შესაძლებელი იყო, რომ ამავე შენობაში განთავსებულიყო ის, რაც ახალ ობიექტში უნდათ.

პროექტის განმარტებით ბარათში წერია, რომ წარმოდგენილი შენობის სიმაღლე ოდნავ (2მ-ით) აღემატება არსებულს, მაგრამ გამზირის მიმართ არის ბევრად "ტოლერანტული" და შერწყმული გარემოსთან:

"შენობის არქიტექტურა გააზრებულია კლასიკური მოტივაციით მაგრამ თანამედროვე გადაწყვეტით, მოპირკეთება იმავე ტიპის ქვით, რაც გამოყენებულია არსებულ შენობაზე".

განმარტებით ბარათში, ასევე, წერია, რომ არსებული შენობა დგას გამზირის გასწვრივ და ბევრად აღემატება მიმდებარე ისტორიულ განაშენიანების ხაზს, კვეთს გამზირის ამ მონაკვეთს განივი მიმართულებით თავისი გვერდითი ფასადის სიბრტყით (უკრაინკას) ქუჩის მხრიდან და ხისტი კუთხის შექმნით ანცალკევებს გამზირის პლასტიურ და დინამიურ ფორმას:

"წარმოდგენილ ესკიზში ხისტი კუთხე შეცვლილია შენობის წრიული ფორმით, რაც არბილებს უკრაინკას ქუჩასა და გამზირს შორის ბმას, აგრეთვე, ქმნის არსებითად სხვა დამოკიდებულებას ახალ შენობასა და წინ მდებარე სივრცეს შორის, რომელიც ქალაქგეგმარებითად მეტად გაიაზრება, როგორც სამოედნე სივრცე, ვიდრე პერიმეტრული განაშენიანებისთვის განკუთვნილი ადგილი".

განახლება: თავიდან სტატიაში ეწერა, რომ არსებული შენობა სილქნეტს ეკუთვნის, თუმცა გადამოწმების შემდეგ დაზუსტდა, რომ სილქნეტს აღნიშნულ მისამართზე 208კვ-ზე განთავსებული აქვს სატელეფონო სადგური, რომელსაც შენობასთან კავშირი არ აქვს, არც აღნიშნულ პროექტთან.