მსახიობ გიორგი გიორგანაშვილს, იგივე ბახალას განაჩენზე გირჩი გამოეხმაურა. მათი თქმით, კიდევ ერთხელ გამოჩნდა, რომ სასამართლოს იმედი არ უნდა გვქონდეს:

"ცხადად გამოჩნდა, რამდენად ერთდროულად სასტიკი და იდიოტურია სისტემა, რომელიც ცხოვრებას უნადგურებს ადამიანებს ქმედებისთვის, რომელსაც არავისთვის ზიანი არ მოუტანია".

გირჩის თქმით, იმ ადამიანებმა, რომლებიც მძიმე ნარკოტიკის მოხმარება-ფლობისთვის იხდიან სასჯელს, საპატიმრო დაწესებულება უნდა დატოვონ:

"კანონში ცვლილებების შეტანას დასჭირდება ბევრი დრო, ამიტომ გირჩი ამნისტიაზე კანონროექტს საგაზაფხულო სესიის დაწყებამდე შეიტანს".

დღეს თბილისის საქალაქო სასამართლომ გიორგი გიორგანაშვილს 0,3726 გრამი ბუპრენორფინის ფლობისთვის 8-წლიანი პატიმრობა მიუსაჯა.

მსახიობები, რომლებიც გიორგანაშვილს მხარს უჭერდნენ ამბობდნენ, რომ აღმოჩენილი ნარკოტიკული საშუალება მსახიობს არ ეკუთვნოდა და მის უდანაშაულობაზე საუბრობდნენ. თავად გიორგანაშვილი ბრალს არ აღიარებდა და საპროცესო შეთანხმებასაც არ თანხმდებოდა.