სახელმწიფო უსაფრთხოების სამსახურმა ტერორიზმის საქმეზე, ახმედ ჩატაევისა და მისი დაჯგუფების დახმარების ბრალდებით, კიდევ ერთი პირი, საქართველოს მოქალაქე ანატოლი ბერძენიშვილი დააკავა. უწყებაში ამბობენ, რომ ბერძენიშვილი სასამართლოს განჩინების საფუძველზე დღეს, 22 იანვარს, დააკავეს.

"გამოძიების ამ ეტაპზე დადგენილია, რომ დაკავებული ანატოლი ბერძენიშვილი ჩავიდა თურქეთში ახმედ ჩატაევის და მისი დაჯგუფების წევრების დასახმარებლად. დაკავებულმა, ზურაბ გორნაკაშვილთან და ზურაბ იდოიძესთან ერთად, ახმედ ჩატაევს და მისი დაჯგუფების წევრებს დახმარება გაუწია თურქეთ-საქართველოს საზღვართან, კირნათი-მარადიდის მწვანე ზოლის მონაკვეთამდე გადაადგილებაში", - განმარტავენ სუს-ში.

სუს-მა ტერორიზმის დაფინანსებაში, ტერორისტული საქმიანობის სხვაგვარი მატერიალური მხარდაჭერასა და რესურსებით უზრუნველყოფის ბრალდებით რამდენიმე კვირის წინ ზურაბ იდოიძე დააკავა. ამავე ბრალდებით ხუთი პირის დასაკავებლად კიდევ ერთი სპეცოპერაცია უწყებამ 26 დეკემბერსაც ჩაატარა.

ყველა დაკავებული ერთ საქმეს, ისნის სპეცოპერაციასთან არიან დაკავშირბეულები. 21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია.

ისნის სპეცოპერაციის შესახებ გაიგეთ მეტი.