თბილისში, ძველ იპოდრომთან, ცინცაძე-კარტოზიას ქუჩების გადაკვეთაზე, ესტაკადის მოსაწყობად ტენდერი გამოცხადდა. შესყიდვის სავარაუდო ღირებულება 2 901 669 ლარია.

"ცინცაძისა და კარტოზიას ქუჩების კვეთაზე არსებული სატრანსპორტო კვანძში ვერ უზრუნველყობს სატრანსპორტო ნაკადების გატარებას შეფერხების გარეშე საკონფლიქტო წერტილების არსებობის გამო, ხშირად ადგილი აქვს საცობებს, ავტოსაგზაო შემთხვევებსა და პიკის საათებში მოძრაობა თითქმის პარალიზებულია და კვანძის განტვირთვას რამოდენიმე საათი სჭირდება. კვანძი ერთ დონეშია, არ არსებობს შუქნიშნები, კვანძი გახსნილია ყველა მიმართულებით, არ არსებობს რაიმე შეზღუდვები და მოძრაობა ქაოსურია," - აღნიშნავს თბილისის მერია საპროექტო განაცხადში.

ესტაკადით ცინცაძის ქუჩიდან თამარაშვილის ქუჩისკენ გავა ტრანსპორტი, გარდა ამისა, ესტაკადის ქვეშ შეფერხების გარეშე, გაივლიან ყაზბეგის ქუჩიდან იყალთოს გვირაბისკენ მიმავალი ავტომობილები. ამავე ესტაკადის დახმარებით, ცინცაძის ქუჩიდან თამარაშვილის ქუჩისკენ მიმავალტრანსპორტს შეეძლება მობრუნდეს და გადავიდეს იყალთოს გვირაბისკენ მიმავალ ზოლში.

ტენდერში მონაწილეობა 3 თებერვლიდან 8 თებერვლის ჩათვლითაა შესაძლებელი. გამარჯვებული კომპანია ვალდებული იქნება სამუშაოები დაიწყოს წერილობითი დავალების მიცემიდან 5 კალენდარული დღის ვადაში და დაამთავროს 150 დღეში.