აჭარის ტელევიზიის ინფორმაციით, 2 დღის წინ მოსულმა უხვმა ნალექმა ქედის საკალმახე მეურნეობა სრულად გაანადგურა. დახოცილია ტონობით თევზი, მათ შორის ისეთი ჯიშის თევზები, რომლებიც წითელ წიგნშია შეტანილი. დაზარალებულ კომპანიას ბიზნესის მხოლოდ უძრავი ნაწილი ჰქონდა დაზღვეული, ის ხელისუფლებას ზარალის ანაზღაურებას სთხოვს.

მოულოდნელად მოვარდნილმა ღვარცოფმა გაანადგურა ზუთხის, კალმახი და ორაგული. დახოცილ თევზებს შორიასაა ტონა-ნახევარი სადედე ჯოგის ზუთხი, რომელიც შავ ხიზილალას იძლევა და რომლის 1 კილოგრამის საბაზრო ფასი ათასი დოლარიდან იწყება.

ერთ-ერთი დაზარალებულის, რევაზ გოგიტიძის განმარტებით, მას ბიზნესისათის ბანკიდან ვალი აქვს აღებული, ამიტომ სახელმწიფოს კომპენსაციის გადახდას სთხოვს:

"ისეთ სიტუაციაში ვართ, არაფერი აღარ გაგვაჩნია იმისთვის, რომ ვალები გადავიხადოთ".

გარდა თევზისა, სტიქიამ ადგილობრივი რესტორანიც გაანადგურა, იქ დასაქმებული 200 ადამიანი კი უმუშევარი დარჩა.

შპს აკავრეთა 2007-ის დამფუძნებელი, ნუგზარ დუმბაძე ხელისუფლებას კომპენსაციას ან საბანკო სესხის გარკვეული პერიოდით შეჩერებას სთხოვს:

"სამწუხაროდ საქართველოში არ აზღვევენ, სადაზღვეო კომპანიები არ მოდიან ამ შეთანხმებაზე, რადგან რისკის ფატორი დიდია ან წყალდიდობაა, ან დაავადება. უცხოეთში ყველას აზღვევენ, აქ - არა.

ქედის მუნიციპალიტეტის გამგებლის, დავით დუმბაძის განმარტებით, დაზარალებული კომპანიის შემოსავლები ქედის ადგილობრივი ბიუჯეტის ტოლფასია, მცირე ბიუჯეტის გამო კი ის კომპანიას კომპენსაციას ვერ გადაუხდის.

აჭარის მთავრობის თავჯდომარის, არჩილ ხაბაძის თქმით კი, დაზარალებულებს ვერც აჭარის მთავრობა დაეხმარება, რადგან მათ ბიზნესი სრულად დაზღვეული არ ჰქონდათ:

"სახელმწიფომ თითოეულ ამ ფაქტზე რომ რეაგირება მოახდინოს, ვფიქრობ, არ იქნება სწორი და ჩვენი კომპენსაციები, რომელსაც გადავწყვეტთ, პირველ რიგში, იქნება სოციალური ფონის გამოსასწორებლად".

28 ივნისს ძლიერმა წვიმამ აჭარის მაღალმთიან რეგიონებს ზიანი მიაყენა. გუშინ რეგიონული განვითარებისა და ინფრასტრუქტურის მინისტრმა, ნოდარ ჯავახიშვილმა განმარტა, რომ ქედაში, მერესა და შუახევში ჯამში 7 ხიდი წაიღო სტიქიამ, 2 კი დააზიანა, რის შედეგადაც შუახევში 4 სოფელია მოწყვეტილი გარე სამყაროს.