19 წლის თემირლან მაჩალიკაშვილის დედა, მედიკო მარგოშვილი ამბობს, რომ შვილის სიკვდილს არავის შეარჩენს და ბოლომდე იბრძოლებს სიმართლის დასადგენად.

მაჩალიკაშვილი, რომელიც 26 დეკემბერს, პანკისში, სპეცოპერაციისას თავში დაჭრეს, დღეს დილით, 8 საათზე გარდაიცვალა. ის მას შემდეგ კომაში იმყოფებოდა. იგეგმებოდა დაჭრილის სამკურნალოდ თურქეთში გადაყვანა.

"გამორთეს აპარატიდან, მომიკლეს შვილი. სპეციალურად არ გადაიყვანეს. არ უნდოდათ იმათ ჩემი შვილის სიცოცხლე. ამას სტრასბურგამდე მივიყვან, თუ ცოცხალი ვიქნები, ამას არ შევარჩენ ამ ქვეყანას, ვინც დამნაშავეები არიან", — უთხრა ჟურნალისტებს თემირლან მაჩალიკაშვილის დედამ მედიკო მარგოშვილმა.

სახელმწიფო უსაფრთხოების სამსახურის ინფორმაციით, თემირლან მაჩალიკაშვილსა და 26 დეკემბერს დაკავებულებს კავშირი ჰქონდათ ისნის სპეცოპერაციისას ლიკვიდირებულ ახმედ ჩატაევთან. დაკავებულებს ბრალი ტერორიზმის ხელშეწყობის მუხლით აქვთ წარდგენილი.

სუს-ის ცნობით, მაჩალიკაშვილმა 26 დეკემბრის სპეცოპერაციისას წინააღმდეგობის გაწევა სცადა, რა დროსაც მას სპეცრაზმელმა ესროლა. სპეცრაზმელის ქმედების კანონიერებას პროკურატურა სწავლობს.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია. სუს-ის ცნობით, აღნიშნული პირები ტერორისტულ აქტებს გეგმავდნენ.