კომპანია, რომლის ნამუშევარიც თბილისის მერმა, კახა კალაძემ დაიწუნა, ბათუმში, სახელმწიფოსთან დადებული ხელშეკრულებით, 62 მილიონად სპორტულ კომპლექსს აშენებს.

თბილისის მერმა დღეს, 9 იანვარს, მუხიანში რაგბის სპორტული კომპლექსის გახსნიდან შვიდი თვის შემდეგ, მის მდგომარეობაზე ისაუბრა. კალაძის თქმით, 2017 წლის მაისში გახსნილი, 7 მილიონ ლარად რეაბილიტირებული კომპლექსი ახლიდან არის შესაკეთებელი.

"ნამდვილად შეურაცხმყოფელია ის, რაც ვნახეთ. მაისში გახსნილი სპორტული კომპლექსი დღეს უკვე სარეაბილიტაციოა თავიდან. ძალიან მძიმე მდგომარეობაა გასახდელებში, კორიდორებში", - აღნიშნა კალაძემ და დასძინა, რომ მერიის თანამშრომლები მშენებელი კომპანიის წარმომადგენლებს შეხვდებიან.

კომპლექსის ასაშენებლად დადებული ხელშეკრულება

თბილისის მერიამ მომსახურება ტენდერის სახით შპს საბა კონსტრაქშენისგან შეისყიდა და 6 932 651 ლარი გადაიხადა. ხელშეკრულება 2016 წლის 18 მაისს გაფორმდა და მასში გათვალისწინებული იყო: სამწლიანი საგარანტიო პერიოდი, ბუნებრივი ბალახის მოედნის მოვლა-პატრონობაზე მაღალკვალიფიციური სპეციალისტის მომზადება და ზედამხედველობა მინიმუმ ერთი წლის განმავლობაში. გარდა ამისა, ოთხი მოედნის განახლება: ერთი ბუნებრივსაფარიანი, ორი ხელოვნური და ერთიც ქვიშის. კომპლექსში გათვალისწინებულია სავარჯიშო დარბაზის მშენებლობაც და 1 000 გულშემატკივარზე გათვლილი ტრიბუნა. გარდა ამისა, სავარჯიშო კომპლექსს ექნება საკუთარი პარკინგის ზონა.

შპს საბა კონსტრაქშენი ერთადერთი კომპანია არ იყო, რომელიც ამ ტენდერში მონაწილეობდა. მან თავის ერთ-ერთ კონკურენტზე შპს ალიანსზე, 1 ლარით ნაკლებად შესთავაზა მერიას სამუშაოს შესრულება და ხელშეკრულებაც გააფორმა. თუმცა, ხელშეკრულებაში ცვლილება 2-ჯერ შევიდა და სტადიონის ასაშენებლად გამოყოფილი თანხა 10 პროცენტით, 630 152 ლარით გაიზარდა. თანხის ცვლილება სტადიონის პროექტში შეტანილი ცვლილებითაა დასაბუთებული.

გამარჯვებული კომპანიის გამოცდილება

შპს საბა კონსტრაქშენი, შესყიდვების სააგენტოს ვებგვერდის მიხედვით, კომპანია სახელმწიფოს დაკვეთებს 2013 წლიდან ასრულებს. კომპანიამ სახელმწიფოსთან რამდენიმე ათეული მილიონის ღირებულების ხელშეკრულებები დადო. ბოლო ხელშეკრულება სპორტკომპლექსის აშენებაზეა. შპს სტადიონთან (მფლობელი აჭარის ავტონომიური რესპუბლიკა) დადებული ხელშეკრულებით კომპანიამ 61 977 777 ლარად ბათუმში სპორტკომპლექსი უნდა ააშენოს.