ფინანსთა სამინისტროს ინფორმაციით, თბილისის მუნიციპალიტეტის საკრებულოს ყოფილი თანამშრომელი, დავით გასოევი თაღლითობის ბრალდებით დააკავეს.

უწყების ცნობით, ბრალდებული, ერთ-ერთ მოქალაქეს მოტყუებით დაჰპირდა, რომ ქალაქ თბილისში, მიწის ნაკვეთის საკუთრების უფლების მოპოვებაში დაეხმარებოდა, რისთვისაც გამოიყენებდა საკუთარ კავშირებს თბილისის საკრებულოს წევრებთან, სანაცვლოდ კი მოითხოვა 4 ათასი დოლარი. საგამოძიებო სამსახურმა ბრალდებული თანხის ნაწილის, 2 ათასი დოლარის აღების ფაქტზე დააკავა.

გამოძიება საქართველოს სისხლის სამართლის კოდექსის 180-ე მუხლის პირველი ნაწილით მიმდინარეობს, რაც თაღლითობას გულისხმობს და ისჯება 2 დან 4 წლამდე თავისუფლების აღკვეთას.