პერსონალურ მონაცემთა დაცვის ინსპექტორმა შინაგან საქმეთა სამინისტროს გენერალური ინსპექციის მიერ პირის ჯანმრთელობის მდგომარეობის შესახებ მონაცემების გასაჯაროებაზე მოკვლევა დაიწყო. უწყებამ გუშინ, 27 დეკემებერს, განცხადება გაავრცელა, რომ კახეთში, სოფელ ქისტაურში მოქალაქის საცხოვრებელი სახლის ჩხრეკის დროს ქალის ჯანმრთელობის გაუარესება თავის ტვინში სიმსივნის ზრდამ გამოიწვია.

"კანონი საკმაოდ მაღალ სტანდარტს აწესებს ასეთი [ჯანმრთელობის მდგომარეობის შესახებ] ინფორმაციის დაცვისთვის და დაუშვებლად მიიჩნევს განსაკუთრებული კატეგორიის მონაცემთა გასაჯაროების პირის თანხმობის გარეშე", - განუცხადეს პერსონალურ მონაცემთა დაცვის ინსპექტორის აპარატში On.ge-ს.

მათივე თქმით, უწყებაში ინსპექტირების ფარგლებში დეტალურად შეისწავლიან დიაგნოზის გასაჯაროების სამართლებრივი საფუძვლებს, მიზანს და კანონთან შესაბამისობას.