"ფინანსთა სამინისტროს მიერ გამოყოფილი 14 მილიონი ლარი, სამუშაოების დაუყოვნებლივ დაწყების მიზნით, შპს თბილისის სატრანსპორტო კომპანიის საწესდებო კაპიტალში აისახება და ვაგონების მოდერნიზება-რეკონსტრუქციას მოხმარდება", - ამის შესახებ თბილისის მერმა კახა კალაძემ დედაქალაქის მთავრობის დღევანდელ სხდომაზე განაცხადა.

კახა კალაძის თქმით, ბიუჯეტის პროექტი საკრებულოს მიმდინარე კვირის ბოლოს გადაეგზავნება.

2018 წლის განსახორციელებელი პროექტების ბიუჯეტი ჯამში, 60 მლნ ლარით გაიზარდა კალაძის თქმით, დარჩენილი 46 მლნ ლარი 2018 წლის ბიუჯეტში პირდაპირი წესით აისახება, რომელიც ორბელიანისა და გუდიაშვილის მოედნების რეაბილიტაციას მოხმარდება.

თბილისის მერიის ცნობით, 2018 წლის ბიუჯეტში შეცვლილია შიდა ხარჯები. კერძოდ, ინფრასტრუქტურული ხარჯები წარდგენილ ბიუჯეტთან შედარებით, რომელიც 282 მლნ ლარს შეადგენდა, 55 მლნ ლარით იზრდება:

"2018 წელს დედაქალაქში 55 მლნ ლარით მეტი ინფრასტრუქტურული პროექტი განხორციელდება, ვიდრე ეს იყო დაგეგმილი. ასევე, უნდა აღინიშნოს, რომ მნიშვნელოვნად იზრდება გამწვანების ღონისძიებებისკენ მიმართული თანხებიც. კერძოდ, მწვანე ინფრასტრუქტურაზე მიმართული თანხები, რომელიც 2017 წელს 2 900 000 ლარს შეადგენდა, 2018 წელს, იმ ბიუჯეტით, რომელსაც ჩვენ საკრებულოში წარვადგენთ, 9 მლნ ლარამდე გაიზრდება", - აღნიშნა თბილისის მერმა.

კახა კალაძის განცხადებით, 2018 წლის ბიუჯეტით გათვალისწინებული იქნება ჯანდაცვა და სოციალური უზრუნველყოფა. კერძოდ, მერიის განცხადებით, განხორციელდება ჯანდაცვისა და სოციალური უზრუნველყოფის 32 პროგრამა, მათ შორის, ორი დამატებითი პროგრამა: ფარისებრი ჯირკვლის კიბოს სკრინინგი და ღვიძლის ტრანსპლანტაცია.