გერმანულ-ამერიკული ორგანიზაცია GfK-ს მიერ ჩატარებული კვლევის მიხედვით, საქართველოს საზოგადოების 51.6%-ს მიაჩნია, რომ ქვეყანა არასწორი მიმართულებით ვითარდება.

კითხვაზე, როგორი მიმართულებით ვითარდება ქვეყანა, გამოკითხულთა 27.9% ამბობს, რომ საქართველო სწორი მიმართულებით ვითარდება, 51,6% კი უკმაყოფილოა და მიიჩნევს, რომ ქვეყანას განვითარების არასწორი კურსი აქვს აღებული. 20.5%-ს უჭირს კითხვაზე პასუხის გაცემა.

წინასაარჩევნო გამოკითხვაში მონაწილეობა მიიღო საქართველოს 2,200-მა სრულწლოვანმა მოქალაქემ.

კვლევა პირდაპირი გამოკითხვის გზით, 2016 წლის 7 ივნისიდან 22 ივნისამდე, ჩატარდა.

კვლევა GfK-ს რუსთავი 2-მა დაუკვეთა. ტელეკომპანიის გენერალური დირექტორის ნიკა გვარამიას თქმით, აღნიშნული ორგანიზაცია "უპრეცედენტო სიზუსტითა" და "უმაღლესი სტანდარტით" გამოირჩევა.

რუსთავი 2-ის ინფორმაციით, გამოკითხულთა შერჩევა ემყარებოდა შემთხვევითობის პრინციპს და ცდომილების ზღვარი შეადგენს პლუს ან მინუს 2.1 პროცენტს. გამოკითხულთა 77 % დათანხმდა ინტერვიუზე და კითხვარის შევსებაზე.