საქართველოს ყოფილი პრეზიდენტის ადვოკატმა საქართველოში, ბექა ბასიალაიმ განაცხადა, რომ მიხეილ სააკაშვილის დაკავება სამართლებრივი პროცედურების ჩარჩოებს გასცა და მისი დაკავება პოლიტიკურადაა მოტივირებული.

"ეს არის ბანდიტური გადაწყვეტილება უკრაინის ხელისუფლების მხრიდან, რომელსაც წინ უსწრებდა საქართველოს მოქალაქეების უკანონო გამოძევება, მიხეილ სააკაშვილის დაცვის წევრებზეა საუბარი, მათი ცემა, წამება და ა.შ".

ბასიალაიამ აღნიშნა, რომ დაკავების საფუძველი მისთვის ჯერ უცნობია.

კიევში მიხეილ სააკაშვილი დააკავეს. დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

ფოტო: ირაკლი გედენიძე / პირველი არხი

რამდენიმე დღის წინ მიხეილ სააკაშვილმა განაცხადა, რომ უკრაინის პრეზიდენტმა პეტრო პოროშენკომ მისი დაკავების განკარგულება გასცა. ექს-პრეზიდენტმა თქვა, რომ მას სახელმწიფო გადატრიალების მცდელობას აბრალებდნენ.