კრემლის წარმომადგენლების თქმით, თურქეთის პრეზიდენტმა, ტაიპ ერდოღანმა, რუსეთის პრეზიდენტს, ვლადიმერ პუტინს, წერილი გაუგზავნა, სადაც რუსეთის საჰაერო ძალების თვითმფრინავის ჩამოგდების გამო ბოდიშს იხდიდა. ერდოღანის ნაბიჯი ეკონომიკური სანქციების მოხსნას უკავშირდებოდა. ინფორმაციას როიტერი ავრცელებს.

რუსეთის საჰაერო ძალების რეაქტიული თვითმფრინავი თურქულმა მხარემ 2015 წლის ნოემბერში ჩამოაგდო, როდესაც კრემლის სამხედროები სირიაში მოქმედებებს ახორციელებდნენ. თურქულმა მხარემ მაშინ განაცხადა, რომ თვითმფრინავმა თურქეთის საჰაერო სივრცე გადაკვეთა, რასაც რუსეთი უარყოფდა. თვითმფრინავის ჩამოგდებას რუსი პილოტი ემსხვერპლა.

"მსურს გამოვხატო ჩემი მწუხარება და სამძიმარი გამოვუცხადო დაღუპული პილოტის ოჯახს, ძალიან ვწუხვარ" - ეწერა პუტინისთვის განკუთვნილი ერდოღანის წერილში, განაცხადა კრემლის წარმომადგენელმა.

ერდოღანის პრესსამსახურის წარმომადგენელმა დაადასტურა წერილის არსებობა, თუმცა ცალსახად არ დათანხმებია წერილის იმ ნაწილს, სადაც თურქეთის პრეზიდენტი ბოდიშს იხდის.