ყოფილი ცოლის ანგარებით განზრახ მკვლელობის მცდელობის, ასევე, პოლიციელის სამსახურებრივ საქმიანობასთან დაკავშირებით თავდასხმისა და სიცოცხლის მოსპობის მცდელობის გამო, პროკურატურამ პირს ბრალდება წარუდგინა.

პროკურატურის განცხადებით, გამოძიებამ დაადგინა, რომ განქორწინებულ ცოლ-ქმარს შორის სამართლებრივი დავა დასრულებული იყო. მიუხედავად ამისა, 30 ნოემბერს საღამოს საათებში, ბრალდებული ყოფილ ცოლს დახვდა თბილისში ლუბლიანას ქუჩაზე საცხოვრებელ ბინასთან.

უწყების განცხადებით, ის იარაღის მუქარით სთხოვდა თანასაკუთრებაში არსებული საცხოვრებელი ბინის რეალიზაციის შედეგად მიღებული სრული თანხის დაუყოვნებლივ გადახდას, წინააღმდეგ შემთხვევაში ემუქრებოდა სიცოცხლის მოსპობით:

"რამოდენიმე წუთის განმავლობაში ბ.ბ. ნ.კ.-ს აყენებდა სიტყვიერ და ფიზიკურ შეურაცხყოფას და იარაღით ემუქრებოდა. მან ამ უკანასკნელის დასახმარებლად გამოსულ მეზობლებს არ მისცა ნ.კ.-ს დახმარების საშუალება, რის გამოც მეზობელმა გამოიძახა საპატრულო პოლიცია".

საგამოძიებო ორგანოს ცნობით, შემთხვევის ადგილზე მისულმა საპატრულო პოლიციის თანამშრომლებმა დამორჩილება მოთხოვეს მას, რის საპასუხოდაც ბ.ბ-მ გაისროლა საპატრულო პოლიციის თანამშრომელთა მისამართით, შემდეგ კი ყოფილი ცოლის მისამართით. უწყების ინფორმაციით, ქალი მიღებული ჭრილობის შედეგად უგონოდ დაეცა. დაკავებული ბ.ბ. დროებითი მოთავსების იზოლატორში გადაიყვანეს.

წარდგენილი ბრალდება სასჯელის სახედ და ზომად ითვალისწინებს თავისუფლების აღკვეთას თექვსმეტიდან ოც წლამდე ვადით ან უვადო თავისუფლების აღკვეთას.