დღეს, 12:00 სთ-ზე, გალერია თბილისში, შვედური ბრენდის, H&M-ის მაღაზია ოფიციალურად გაიხსნა. როგორც მოსალოდნელი იყო, გახსნის ცერემონიას რამდენიმე ასეული ადამიანი ესწრებოდა. მაღაზიის დათვალიერებისა და ტანსაცმლის მყიდველთა რიცხვი იმდენად ბევრი იყო, რომ რიგი თავისუფლების მოედნის მეტროდან, მოსწავლე-ახალგაზრდობის სასახლემდე გრძელდებოდა.

რიგებს შორის, დაცვის თანამშრომლებს, სპეციალური ბარიერები ჰქონდათ ჩადგმული, რათა თავიდან აეცილებინათ ქაოსი და ჭყლეტვა.

გალერია თბილისის შენობასთან საზეიმო ღონისძიება 11:30 სთ-ზე დაიწყო, რომელიც H&M-ის კონსულტანტებმა ორიგინალურად გახსნეს. ცერემონიას მსახიობი სალომე კოკუაშვილი და ტელეწამყვანი ირაკლი მაქაცარია უძღვებოდნენ. ღონისძიებას მუსიკალურად Dj Rembo აფორმებდა, რომლის დაკრულ მუსიკაზე რიგში მდგომი ადამიანები ენერგიულად ცეკვავდნენ და ერთობოდნენ.

H&M-ის გადაწყვეტილებით, ყველაზე მონდომებული მომხმარებლები ფასდაკლების ვაუჩერებით დასაჩუქრდნენ. კერძოდ, იმ ადამიანებმა, ვინც გახსნის ცერემონიაზე პირველი, მეორე და მესამე მივიდნენ, სასაჩუქრე ბარათები მიიღეს. რიგში მყოფ პირველ ადამიანს 200 ლარიანი, მეორეს 100 ლარიანი, ხოლო მესამეს 50 ლარიანი ვაუჩერი გადაეცა.

რიგში დგომა სხვა მომხმარებლებსაც დაუფასდათ და უსაჩუქროდ არც ისინი დარჩენილან. კომპანიის გადაწყვეტილებით, ღონისძიებაზე მისულ პირველ ათას ადამიანს 30 ლარიანი ვაუჩერი გადაეცა.

მაღაზიის გახსნაზე მოსული ადამიანების განწყობაზე კონსულტანტებიც ზრუნავდნენ, რომლებმაც ჯერ სპეციალური ფლეშმობი შეასრულეს, შემდეგ კი მაღაზიის შესასვლელთან გადაინაცვლეს, საიდანაც გამარჯვებულ მომხმარებლებს ამხნევებდნენ.

H&M-ის მაღაზიის კარები ზუსტად 12:00 სთ-ზე გაიხსნა და პირველ კლიენტებს უმასპინძლა. რამდენიმე წუთში, მაღაზიის სამივე სართულზე ადამიანები სასურველ ტანისამოსს ათვალიერებდნენ და ირგებდნენ. მიუხედავად ხალხმრავლობისა, ქაოსს ადგილი არ ჰქონია. დაცვის თანამშრომლები ზრუნავდნენ, რომ ადამიანები ორგანიზებულად შესულიყვნენ მაღაზიაში, ისე რომ ხელი არავის შეშლოდა.

H&M-ის მაღაზია სამ სართულად იყოფა. პირველ სართულზე ქალების ტანსაცმელია, მეორეზე კაცების, ხოლო მესამეზე ბავშვების. მაღაზიაში ზამთრის კოლექცია ჭარბობს, თუმცა არც ზაფხულის ტანსაცმლის პოვნა გაგიჭირდებათ. ფასები ბრენდის შესაბამისია, რაც ხელმისაწვდომს ნიშნავს. თუ ჯერ კიდევ არ მისულხართ ახლადგახსნილ მაღაზიაში, გეტყვით, რომ ამ დრომდე 20%-იანი ფასდაკლება მოქმედებს.

შეგახსენებთ, რომ H&M-ის მაღაზიის პირველი გახსნის ცერემონია 16 ნოემბერს შედგა, რომელსაც VIP სტუმრები ესწრებოდნენ. დღეიდან კი, მაღაზიის კარი ნებისმიერი მსურველისთვის ღიაა.