საზოგადოებრივი მაუწყებლის აჭარის ტელევიზიის გადამღები ჯგუფისთვის ხელისშეშლის გამო თურქეთის მებაჟეები სამსახურიდან გაათავისუფლეს. ამის შესახებ ინფორმაციას აჭარის ტელევიზია ავრცელებს.

"ინციდენტის გამო, თურქული მხარის საბაჟო სამსახურის თანამშრომელთა ნაწილი დაკავებული თანამდებობებიდან გაათავისუფლეს. ამის შესახებ ცოტა ხნის წინ, თურქეთის რესპუბლიკაში ოფიციალური ვიზიტით მყოფმა აჭარის მთავრობის თავმჯდომარემ საზოგადოებრივი მაუწყებლის აჭარის ტელევიზიას განუცხადა. ზურაბ პატარაძის ინფორმაციით, ზოგიერთი მებაჟე სხვადასხვა პოზიციაზე გადაიყვანეს", - ამ ინფორმაციას ავრცელებს აჭარის ტელევიზია.

საზოგადოებრივი მაუწყებლის აჭარის ტელევიზიისა და რადიოს ჟურნალისტმა, ჯენი კვანტალიანმა On.ge-ს 25 სექტემბერს განუცხადა, რომ თურქეთის საბაჟო სამსახურის თანამშრომლებმა ფიზიკური შეურაცხყოფა მიაყენეს.

მისი თქმით, ის და თავისი ოპერატორი საზღვრის ნეიტრალურ ზონაში გადაღებას არ გეგმავდნენ, თუმცა ამის მიუხედავად თურქეთის საბაჟო სამსახურის თანამშრომლებმა ოპერატორისთვის კამერის წართმევა სცადეს და მოსთხოვეს მეხსიერების ბარათისა და ელემენტის მოხსნა და მათთვის მიცემა.