იუსტიციის სამინისტროს მიერ ინიცირებული კანონპროექტი, რომელიც კენჭისყრის შენობაში, ან მათ მიმდებარე ტერიტორიაზე ძალადობისთვის ადგენს პასუხისმგებლობას, პარლამენტმა პლენარულ სხდომაზე, 78 ხმით ერთხმად მიიღო.

კანონპროექტის თანმდევი პროექტის მიხედვით, საუბნო საარჩევნო კომისიის თავმჯდომარის მოთხოვნით შეიძლება პოლიციის გამოძახება. ასევე, კენჭისყრის შენობაში და მის მიმდებარე ტერიტორიაზე შეიძლება იმყოფებოდნენ პოლიციის თანამშრომლები პატრულირებდნენ. კანონპროექტი 80 ხმით, 3-ის წინააღდეგ, მეორე მოსმენით მიიღეს.

განხილვისას, აღნიშნულ პროექტთან მიმართებით, დეპუტატებს შენიშვნები ჰქონდათ.

ფრაქცია თავისუფალი დემოკრატების წევრის, შალვა შავგულიძის განცხადებით, ჩანაწერიდან არ ჩანს ვისი ნებართვით შეიძლება იმყოფებოდნენ პოლიციელები კენჭისყრის შენობის მიმდებარე ტერიტორიაზე.

იურიდიულ საკითხთა კომიტეტის თავმჯდომარის, ფრაქცია რესპუბლიკელების წევრის, ვახტანგ ხმალაძის განცხადებით, შესაბამის მუხლში უნდა ჩაიწეროს, რომ საზოგადოებრივი წესრიგის დარღვევის საფრთხის ან დარღვევის აღმოფხვრის შემდეგ, პოლიციამ უნდა დატოვოს კენჭისყრის შენობის მიმდებარე ტერიტორია.

იუსტიციის მინისტრის პირველმა მოადგილემ, ალექსანდრე ბარამიძემ განაცხადა, რომ შესაბამის მუხლში დაემატება ჩანაწერი, რომლის თანახმად, აუცილებლობის აღმოფხვრის შემთხვევაში პოლიცია დატოვებს კენჭისყრის შენობის მიმდებარე ტერიტორიას. კანონპროექტი 80 ხმით, 3-ის წინააღდეგ, მეორე მოსმენით იქნა მიღებული.

კანონპროექტის მიხედვით, კოდექსს უნდა დაემატოს მუხლი 1621, რომლის მიხედვით, საარჩევნო უბანზე, საარჩევნო კომისიის განთავსების ადგილას, ან მათ მიმდებარე ტერიტორიაზე, წინასაარჩევნო კამპანიის ღონისძიების დროს ძალადობა ან ძალადობის მუქარა დაისჯება ჯარიმით ან/და თავისუფლების აღკვეთით ვადით ორ წლამდე.

იგივე ქმედება, რაც ჯანმრთელობის განზრახ მსუბუქ დაზიანებას გამოიწვევს, დაისჯება ჯარიმით ან/და თავისუფლების აღკვეთით ვადით სამ წლამდე.

ამას გარდა, ცვლილება შედის საქართველოს ორგანული კანონის საქართველოს საარჩევნო კოდექსში, რომლის მიხედვით, კომისიის თავმჯდომარეს შეეძლება პოლიციის გამოძახება საზოგადოებრივი წესრიგის დარღვისას.

ასევე, 59-ე მუხლს დაემატება ახალი ნორმა, რომლის თანახმად, კენჭისყრის შენობის მიმდებარე ტერიტორიაზე, მაგრამ არა კენჭისყრის შენობაში, პოლიციის თანამშრომლები შეიძლება პატრულირებდნენ საუბნო საარჩევნო კომისიის თავმჯდომარის მოთხოვნისა და თანხმობის გარეშეც, თუ ეს სრულიად აუცილებელია საზოგადოებრივი წესრიგის დარღვევის აღკვეთის ან დაცვის მიზნით.