ACT დაინტერესდა, თუ რამდენად ხშირად იტარებენ თბილისელები ჯანმრთელობის შემოწმების მიზნით სამედიცინო გამოკვლევებს.

როგორც კვლევამ აჩვენა, პროფილაქტიკური სამედიცინო გამოკვლევების ჩატარების კულტურა დედაქალაქში არც თუ ისე გავრცელებული კულტურაა.

კვლევის მონაცემებით:

  • ათიდან ოთხ თბილისელს (44%) არასოდეს ჩაუტარებია პროფილაქტიკური სამედიცინო გამოკვლევა;
  • თბილისელების ერთი მესამედი (32%) ამ მიზნით სამედიცინო გამოკვლევებს სულ მცირე წელიწადში ერთხელ იტარებს;
  • თბილისელების ერთი მეოთხედი (24%) პროფლაქტიკური გამოკვლევებისთვის სამედიცინო დაწესებულებას ორ წელიწადში ერთხელ ან უფრო იშვიათად მიმართავს.

ეისითი ასევე დაინტერესდა, ბოლო პერიოდში თბილისელების რა ნაწილმა მიმართა ექიმს უშუალოდ ჯანმრთელობასთან დაკავშირებული პრობლემების გამო. როგორც ირკვევა, თბილისელების ნახევარი (50%) ბოლო 6 თვის განმავლობაში ყოფილა ექიმთან ამ მიზეზით. აღსანიშნავია, რომ ექიმთან ვიზიტის პრაქტიკა უფრო მაღალია 60 წლის და უფროსი ასაკის თბილისელებში.

კვლევის ფარგლებში ასევე გაირკვა, რომ ჯანმრთელობასთან დაკავშირებული პრობლემების მქონე თბილისელების უმრავლესობა, ბოლო 6 თვის მანძილზე ყოფილა ოჯახის ექიმთან (66%). ამ სეგმენტში სხვა პროფილის ექიმებთან ვიზიტის პრაქტიკა შედარებით დაბალია და 12%-ს არ აღემატება. კვლევის შედეგებიდან ირკვევა, რომ 60 წლის და უფროსი ასაკის თბილისელები, გარდა ოჯახის ექიმისა, ბოლო 6 თვის განმავლობაში ჯანმრთელობის პრობლემების გამო ასევე მიმართავედნენ კარდიოლოგებს (25%) და ოფთალმოლოგებს (15%), ხოლო 18-35 წლის ასაკის თბილისელები კი გარდა ოჯახის ექიმისა, ბოლო 6 თვის მანძილზე ასევე ყოფილან გინეკოლოგთან (24%) და სტომატოლოგთან (19%).

ფოტო: ACT

კვლევა ჩატარდა თბილისის მაშტაბით, შემთხვევითი შერჩევის გზით 400 ზრდასრულ თბილისის მოსახლეს შორის, 2017 წლის 7 ოქტომბრიდან 9 ოქტომბრამდე პერიოდში. მონაცემთა სტატისტიკური ცდომილება საშუალოდ 3%-6,5%-იან შუალედში მერყეობს. გამოყენებული მეთოდი – პირისპირ ინტერვიუ.