ევროპული საქართველოს ერთ-ერთი ლიდერის გიგა ბოკერიას თქმით, მთავრობის საკადრო ცვლილებები "მინიმალურ სტანდარტსაც ვერ პასუხობს". მისივე განმარტებით, დაწინაურდა და ძალაუფლება შეინარჩუნეს იმ პირებმა, რომლებსაც ბიძინა ივანიშვილთან ახლო ურთიერთობები აქვთ.

"გახარია, რომელიც არც პოლიტიკურ ფიგურას წარმოადგენს და არც ამავდროულად პოლიციასთან არანაირი შეხება არ ჰქონია, ინიშნება შს მინისტრად. ორი კრიტერიუმი შეიძლება არსებობდეს, ეს არის, ან პროფესიული გამოცდილება ან პოლიტიკური წონა და პოლიტიკური გამოცდილება. არც ერთ კრიტერიუმს, ეს ადამიანი არ აკმაყოფილებს, მაგრამ არის ივანიშვილის ახლო თანამშრომელი მოსკოვის პერიოდიდან".

დღეს, 13 ნოემბერს გამართულ ბრიფინგზე პრემიერ-მინისტრმა გიორგი კვირიკაშვილმა დაადასტურა მთავრობაში დაგეგმილი ცვლილებები, რომლის მიხედვით, შინაგან საქმეთა მინისტრის პოსტზე გიორგი მღებრიშვილს გიორგი გახარია შეცვლის. ის ვიცე-პრემიერის პოსტსაც დაიკავებს.

ეკონომიკის მინისტრის პოსტზე გიორგი გახარიას მოქმედი ფინანსთა მინისტრი დიმიტრი ქუმსიშვილი დაბრუნდება.