ჯერჯერობით უცნობია, თუ სად გააგრძელებს საქმიანობას ალექსანდრე ჯეჯელავა. ამის შესახებ განათლებისა და მეცნიერების სამინისტროს პრესსამსახურმა On.ge-ს განუცხადა.

დღეს, 13 ნოემბერს გამართულ ბრიფინგზე პრემიერ-მინისტრმა გიორგი კვირიკაშვილმა დაადასტურა მთავრობაში დაგეგმილი ცვლილებები, რომლის მიხედვით, განათლების მინისტრის პოსტზე ალექსანდრე ჯეჯელავას მიხეილ ჩხენკელი შეცვლის.

ახალწარდგენილი მინისტრი, აქამდე, ივანე ჯავახიშვილის სახელობის თბილისის სახელმწიფო უნივერსიტეტის რექტორის მოადგილის პოსტს იკავებდა.

ალექსანდრე ჯეჯელავა მინისტრის თანამდებობას გასული წლის ივნისიდან იკავებდა. მანამდე ის მართვის აკადემიის თავმჯდომარე და წამყვანი ტრენერი იყო ზოგადი მენეჯმენტის, გაყიდვების მართვის, დროის მართვისა და პროექტების მართვის მიმართულებით.