მსოფლიოს სხვადასხვა კუთხეში მცხოვრები ადამიანებისთვის საშობაო სეზონი ნაძვის ხის მორთვით თუ საახალწლო აქსესუარების ყიდვით არ იწყება. მაგალითად ჩვენ, ერთი განსაკუთრებული ბრიტანული კომპანიის საშობაო რეკლამას ველოდებით.

უკვე მრავალი წელია, რაც, John Lewis ჩვენს გულებს თავისი საშობაო რეკლამებით ათბობს.

2017 წლის რეკლამაში, პატარა ბიჭი მისი საწოლის ქვეშ მცხოვრები მხვრინავი მონსტრის გაჩუმებას ცდილობს, რომელიც ძილის საშუალებას არ აძლევს, თუმცა საბოლოოდ მას უმეგობრდება.

ბიჭი და ფუმფულა მონსტრი ყოველ ღამეს ერთად ატარებენ, თამაშობენ, ხტუნაობენ, ერთობიან. მეორე დღეს კი პატარა ბიჭს ყველგან ეძინება - სკოლაში, დალაქთან, ფეხბურთის თამაშისას...

საბოლოოდ კეთილი მონსტრი გადაწყვეტს, თავის მეგობარს დაძინებაში დაეხმაროს და მას განსკუთრებულ საშობაო საჩუქარს უგზავნის.

ჯონ ლუისის ბოლო რეკლამა მიშელ გონდრიმ გადაიღო, რომელიც Eternal Sunshine of the Spotless Mind-ის რეჟისორიცაა. რეკლამის საუნდტრეკია ბითლზის Golden Slumbers-ის ქავერი, რომელსაც ბრიტანული ბენდი Elbow ასრულებს.

John Lewis-ის კამპანიები ერთ-ერთი წარმატებულია მსოფლიოში, მაღაზიათა ქსელის გაყიდვები ახალი რგოლის გამოსვლისთანავე იზრდება. მაგალითად, 2014 წელს, პინგვინი მონტის შეძენა ბრიტანეთში თითქმის შეუძლებელი იყო, რადგან სათამაშოს მარაგი რგოლის გამოსვლიდან რამდენიმე დღეში ამოიწურა. გადაავლეთ თვალი ჯონ ლუისის გასული წლების საშობაო რეკლამებს.