პარტია გახარია საქართველოსთვის აღმასრულებელმა მდივანმა, ბერდია სიჭინავამ ბრიფინგზე ოკუპირებულ ცხინვალის რეგიონში მიმდინარე ე.წ. საპრეზიდენტო არჩევნები და რუსეთთან ინტეგრაციის პროცესები მკაცრად დაგმო. მისი თქმით, კრემლის მიერ არაადგილობრივი კანდიდატის დასახელება და მიმდინარე მოვლენები რეგიონის ფაქტობრივ ანექსიას ემსახურება, რაზეც საქართველოს ხელისუფლება დანაშაულებრივ დუმილს და უმოქმედობას ინარჩუნებს.

ბერდია სიჭინავას თქმით, ოკუპირებულ ცხინვალის რეგიონში მიმდინარეობს ე.წ. საპრეზიდენტო არჩევნები, სადაც კრემლმა კანდიდატად პირველად დაასახელა რუსეთში დაბადებული პირი, რომლის მთელი კარიერაც რუსულ სახელმწიფო სტრუქტურებს უკავშირდება.

"დღეს, ოკუპირებული ცხინვალის რეგიონში ტარდება დე ფაქტო საპრეზიდენტო ეგრეთ წოდებული არჩევნები, სადაც კრემლის მიერ პირველად საპრეზიდენტო კანდიდატადაა დასახელებული არაადგილობრივი, რუსეთის ფედერაციაში დაბადებული პირი მარატ კამბოლოვი, რომლის მთელი კარიერა რუსეთის ფედერალურ სახელმწიფო სტრუქტურებს უკავშირდება", — თქვა სიჭინავამ.

მისივე განცხადებით, ეს პროცესი ემთხვევა მაისში რუსეთსა და დე ფაქტო ცხინვალს შორის გაფორმებულ შეთანხმებას, რომლის საბოლოო მიზანიც რეგიონის ფაქტობრივი ანექსია და ჩრდილოეთ ოსეთისთვის მიერთებაა.

"ეგრეთ წოდებული საპრეზიდენტო არჩევნები ოკუპირებულ ცხინვალში ტარდება 2026 წლის 9 მაისს რუსეთის ფედერაციასა და დე ფაქტო ცხინვალს შორის ხელმოწერილი შეთანხმების ფონზე, რომლის საბოლოო მიზანი რუსეთის ფედერაციის მიერ ცხინვალის რეგიონის ფაქტობრივი ანექსიაა და მისი ჩრდილოეთ ოსეთისთვის შესაბამისად, რუსეთის ფედერაციისთვის მიერთება", — აღნიშნა ბერდია სიჭინავამ.

პოლიტიკოსმა მწვავედ გააკრიტიკა ხელისუფლება და აღნიშნა, რომ ისინი დუმან და აგრძელებენ ქვეყნის იზოლაციას.

"ჩვენი ქვეყნისთვის ამ მძიმე პროცესებთან დაკავშირებით, ოცნების ხელისუფლება აგრძელებს დანაშაულებრივ დუმილს და უმოქმედობას, ოკუპანტებისთვის ბოდიშის მოხდის პოლიტიკას. დასავლელი პარტნიორებისაგან ქვეყნის იზოლაციისა და საქართველოს რუსეთის ფედერაციასთან პირისპირ დატოვების პროცესს", — აღნიშნა მან.

სიჭინავამ ყურადღება გაამახვილა ჩორჩანას საქმეზე მიმდინარე სასამართლო პროცესზეც და აღნიშნა, რომ ხელისუფლება ასამართლებს იმ ადამიანებს, ვინც სოფელი ოკუპაციას გადაარჩინა.

"სიმბოლურია, რომ დღეს ასევე ტარდება სასამართლო პროცესი ჩორჩანას საქმეზე, სადაც ოცნების ხელისუფლება ასამართლებს საკუთარი ქვეყნის შინაგან საქმეთა მინისტრსა და პრემიერმინისტრ გიორგი გახარიას ცხინვალის საოკუპაციო რეჟიმის პრეტენზიებით და მათ აძლევს იურიდიულ საფუძვლებს არა მხოლოდ საპოლიციო საგუშაოს ასაღებად, არამედ მთლიანად ხაშურის მუნიციპალიტეტის სოფელი ჩორჩანას მისაცემად, რომელიც 2019 წელს გიორგი გახარიამ ოკუპაციას გადაარჩინა", — თქვა პოლიტიკოსმა.

როგორც ბრიფინგზე აღინიშნა, კანდიდატ მარატ კამბოლოვის რიტორიკაში მნიშვნელოვანი ადგილი უჭირავს ჩორჩანას საკითხს.

"მარატ კამბოლოვის საარჩევნო რიტორიკაში დიდი ადგილი უჭირავს ჩორჩანას საკითხს, რომელსაც საოკუპაციო რეჟიმის წარმომადგენლები განიხილავენ ეგრეთ წოდებული სამხრეთ ოსეთის რესპუბლიკის ტერიტორიად და ადგილობრივ წრეებში პოზიტიურ მოლოდინებს აჩენენ ტერიტორიის ეგრეთ წოდებულ რესპუბლიკაში დაბრუნებასთან დაკავშირებით", — თქვა სიჭინავამ.

ოპოზიციური პარტიის წარმომადგენლის შეფასებით, ოკუპანტები ცდილობენ ძალის გამოუყენებლობის შეთანხმებით შეინიღბონ და საქართველო აგრესორად გამოიყვანონ.

"ოკუპანტები ელიან ძალის გამოუყენებლობის ეგრეთ წოდებულ შეთანხმებას, რითაც რუსეთს სურს შეინიღბოს საკუთარი როლი, როგორც აგრესორის, კონფლიქტის მონაწილედ გამოაცხადოს მარიონეტული რეჟიმი, საქართველო კი აგრესორად და შემდგომ ოფიციალურმა თბილისმა დაიწყოს ოკუპირებული რეგიონების ეგრეთ წოდებული დამოუკიდებლობის აღიარების პროცესი", — თქვა მან.

ბერდია სიჭინავამ მადლობა გადაუხადა საერთაშორისო პარტნიორებს მხარდაჭერისთვის და დასასრულს, მან მთავრობას საერთაშორისო ძალისხმევის მობილიზებისკენ მოუწოდა.

"კიდევ ერთხელ მადლობას ვუხდით ჩვენს საერთაშორისო პარტნიორებს საქართველოს ეროვნული ინტერესების, სუვერენიტეტისა და ტერიტორიული მთლიანობის განგრძობითად და ურყევად მხარდაჭერისთვის.

კიდევ ერთხელ მოვუწოდებთ ოცნების ხელისუფლებას ჩვენი საერთაშორისო პარტნიორების მობილიზებისთვის, რათა მკაფიოდ, საერთაშორისო დონეზე დაიგმოს საქართველოს ტერიტორიების ანექსიის პროცესი და საერთაშორისო დიპლომატიური ზეწოლის ფონზე შევძლოთ ანექსიური პროცესების შეჩერება ცხინვალის რეგიონში", — თქვა ბერდია სიჭინავამ.

ცნობისთვის, დღეს, 18 სექტემბერს, ოკუპირებულ ცხინვალის რეგიონში ე.წ. რიგგარეშე საპრეზიდენტო არჩევნები მიმდინარეობს. მთელ რეგიონში 70 საარჩევნო უბანია მომზადებული, რუსეთში კი — ხუთი. ე.წ. რესპუბლიკის მცხოვრებლები არჩევანს ოთხ კანდიდატს შორის გააკეთებენ: ესენი არიან დე ფაქტო მოქმედი პრეზიდენტი მარატ კამბოლოვი, პოლიტიკური პარტია "ერთობის" ლიდერი ზურაბ კოკოევი და ძალოვანი უწყებების წარმომადგენლები მურატ ვალიევი და ყაზბეკ კოდოევი.