ახალგაზრდა იურისტთა ასოციაცია (საია) გიორგი გახარიას წინააღმდეგ წარდგენილ ბრალთან დაკავშირებით, საქმის მასალების შესწავლის საფუძველზე, სოფელ ჩორჩანაში საგუშაგოს მოწყობის ეპიზოდზე შეფასებას აქვეყნებს.

როგორც ორგანიზაციაში აცხადებენ, ეს საქმე სცდება ერთი კონკრეტული პირის სამართალწარმოების ფარგლებს და პირდაპირ უკავშირდება საქართველოს სუვერენიტეტს, ტერიტორიულ მთლიანობას, საოკუპაციო ხაზთან მცხოვრები მოსახლეობის უსაფრთხოებასა და სახელმწიფოს კონსტიტუციურ ვალდებულებებს მცოცავი ოკუპაციის პირობებში.

ძირითადი მიგნებები და პრობლემები საქმეში:

ორგანიზაცია წერს, რომ პროკურატურის მთავარი თეზისი იმის შესახებ, რომ გახარიამ გადაწყვეტილება სუს-თან, ევროკავშირის სადამკვირვებლო მისიასთან (EUMM), პრემიერმინისტრთან და უსაფრთხოების საბჭოსთან შეუთანხმებლად მიიღო, საქმეში არსებულ სხვა მტკიცებულებებს ეწინააღმდეგება.

საიას განმარტებით, ბრალდების მხარეს უნდა დაესაბუთებინა უფლებამოსილების აშკარა გადამეტება, ზიანი, პირდაპირი განზრახვა და მიზეზობრივი კავშირი. ტექნიკური ან პროცედურული ხასიათის დარღვევა პოლიტიკური გადაწყვეტილების სისხლისსამართლებრივ კრიმინალიზებას ვერ გაამართლებს.

საია აღნიშნავს, რომ პრობლემურია როგორც დაცვის უფლებისა და მხარეთა თანასწორობის პრინციპი, ისე ბრალდების მოთხოვნა წინასასამართლო სხდომის ვადის გახანგრძლივებაზე — გაურკვეველი მტკიცებულებების მოპოვების მიზნით.

ორგანიზაცია აღნიშნავს, რომ საქმისთვის მნიშვნელოვანი მოწმეების დაკითხვა სასამართლოს არსებითი განხილვის ეტაპზე დახურულ რეჟიმში მიმდინარეობს, რაც მაღალი საზოგადოებრივი ინტერესის ფონზე საჯაროობას ზღუდავს.

ორგანიზაცია მიიჩნევს, რომ ეს საქმე ქვეყანაში არსებული დემოკრატიული და მართლმსაჯულების კრიზისის ნაწილია. სიტუაციას ართულებს ისიც, რომ საოკუპაციო რეჟიმი ამ პროცესს საკუთარი პოლიტიკური მიზნებისთვის იყენებს.

საია აღნიშნავს, რომ საყურადღებოა ქართული ოცნების მიერ ოპოზიციური პარტიების დევნის ფონიც, მათ შორის — საკონსტიტუციო სასამართლოში შეტანილი სარჩელი პარტია გახარია საქართველოსთვის აკრძალვის მოთხოვნით.

საია აცხადებს, რომ გააგრძელებს მაღალი საზოგადოებრივი ინტერესის მქონე იმ საქმეების მონიტორინგს, რომლებსაც შესაძლოა პოლიტიკური მდგენელი ჰქონდეს, და საზოგადოებას შესაბამის შეფასებებს ეტაპობრივად მიაწვდის.

საიას შეფასება სრულად წაიკითხეთ აქ.