უზენაესი სასამართლოს 15-წევრიანმა პლენუმმა დღეს ერთხმად აირჩია საკონსტიტუციო სასამართლოს მოსამართლე თეიმურაზ ტუღუში. პლენუმისთვის მხოლოდ მისი კანდიდატურა იყო წარდგენილი.

უზენაესი სასამართლოს განცხადებით, პლენუმის წევრები გაეცნენ წარდგენილ კანდიდატს, მიიღეს მისგან მათთვის საინტერესო შეკითხვებზე პასუხი, რის შემდეგაც საკონსტიტუციო სასამართლოს წევრად უზენაესი სასამართლოს პლენუმმა დანიშნა თეიმურაზ ტუღუში.

მიმდინარე წლის სექტემბრის ბოლოდან საკონსტიტუციო სასამართლოს 4 მოსამართლეს ეწურება უფლებამოსილება, ესენი არიან:

  • გიორგი პაპუაშვილი;
  • კონსტანტინე ვარძელაშვილი;
  • ქეთევან ერემაძე;
  • ოთარ სიჭინავა;

პრეზიდენტმა გიორგი მარგველაშვილმა თავისი კვოტის ფარგლებში, საკონსტიტუციო სასამართლოს მოსამართლეებად პრეზიდენტის ყოფილი საპარლამენტო მდივანი, გიორგი კვერენჩხილაძე და უშიშროების საბჭოს ყოფილი მდივანი, ირინა იმერლიშვილი დანიშნა. რაც შეეხება მეოთხე, ვაკანტურ ადგილს, ის პარლამენტის მიერ არჩეულმა წევრმა უნდა დაიკავოს.