ადვოკატი გიორგი ონიანი თბილისის საქალაქო სასამართლომ დამნაშავედ სცნო და ოთხი წლითა და ექვსი თვით თავისუფლების აღკვეთა მიუსაჯა. განაჩენი მოსამართლემ დღეს დილით, 7 ნოემბერს გამოაცხადა. გიორგი ონიანი სასამართლო დარბაზში დააკავეს.

შს მთავარი სამმართველოს გლდანი-ნაძალადევის სამმართველოს უფროსის ყოფილ მოადგილეს, გიორგი ონიანს გამოძიება სამსახურებრივი უფლებამოსილების გადამეტებას, მტკიცებულებების ფალსიფიკაციას, პოლიტიკურ დევნასა და პირისთვის თავისუფლების უკანონოდ აღკვეთას ედავებოდა. ის ოთხივე ეპიზოდში დამნაშავედ სცნეს.

გამოძიების ვერსიით, 2011 წლის 17 ოქტომბერს, განსხვავებული პოლიტიკური შეხედულებების გამო, გიორგი ონიანმა უკანონოდ დააკავა კოალიცია ქართული ოცნების მხარდამჭერი ლევან მდინარაძე (საზოგადოებისთვის ცნობილი ზედმეტსახელით დიჯეი რემბო).

პროკურატურის მტკიცებით, ონიანის ბრძანებით დაკავებული გლდანი-ნაძალადევის სამმართველოს ადმინისტრაციულ შენობაში ისე გადაიყვანეს, რომ არ გაჩხრიკეს.

ბრალდების მხარე აცხადებს, რომ ლევან მდინარაძის მიმართ სისხლის სამართლის საქმის ხელოვნურად შექმნის მიზნით, გიორგი ონიანმა საქმის გამომძიებელს ნარკოტიკული საშუალება მარიხუანა წარუდგინა და დაავალა, რომ საქმის მასალებში აესახა ამ ნარკოტიკული საშუალების ამოღების ფაქტი.

პროკურატურა ასევე აცხადებს, რომ კიდევ ერთი ბრალდების მიხედვით, ონიანმა ქართული ოცნების ლოგოიანი მაისურების დამზადებისთვის, ზემოხსენებულ ფაქტამდე 2 დღით ადრე შპს დაო-პრინტის მენეჯერი დავით შათირიშვილი იდენტური სცენარით უკანონოდ დააკავა. აღნიშნულ საქმეზე თბილისის საქალაქო სასამართლოს განჩინების საფუძველზე დააკავეს ის და 2014 წლის 26 თებერვალს აღკვეთის ღონისძიების სახით საპატიმრო გირაო 20 000 ლარის ოდენობით შეეფარდა, რაც მოგვიანებით პროკურატურამ გაასაჩივრა.