ნორვეგიის მეფე ჰარალდ V 89 წლის ასაკში გარდაიცვალა. მონარქი გასულ კვირას სისხლის იშვიათი დაავადების მკურნალობის კურსის გასავლელად საავადმყოფოში გადაიყვანეს. ინფორმაციას BBC ავრცელებს.

ოსლოს სამეფოს ინფორმაციით, მეფე პარასკევს, ადგილობრივი დროით 06:35 საათზე, ოსლოს ეროვნულ საავადმყოფოში გარდაიცვალა.

გარდაცვალებამდე ბოლო 24 საათის განმავლობაში მას სამეფო ოჯახის წევრები სტუმრობდნენ, მოქალაქეებმა კი სასახლესთან ყვავილები მიიტანეს.

ჰარალდი XIV საუკუნის შემდეგ ნორვეგიის პირველი მეფე იყო, რომელიც უშუალოდ ნორვეგიაში დაიბადა. ტახტზე მას მისი ვაჟი, ჰაკონი შეცვლის.

BBC წერს, რომ ტახტზე გატარებული 35 წლის შემდეგ, მას დაიმახსოვრებენ როგორც პოპულარულ და რეფორმატორ მონარქს, რომელმაც სამეფო ინსტიტუტი გაათანამედროვა, დაარღვია ტრადიცია უბრალო წარმოშობის ქალზე დაქორწინებით და ქვეყნისთვის ყველაზე მძიმე წუთებში გამაერთიანებელ ფიგურად მოგვევლინა.

ბოლო პერიოდში მეფე და მისი ოჯახი ჯანმრთელობის პრობლემებსა და სკანდალებს შეეჯახნენ. მათ შორის განსაკუთრებული გამოხმაურება მოჰყვა რძლის, მეტე-მარიტის კავშირს გარდაცვლილ სექსუალურ დამნაშავე ჯეფრი ეპშტეინთან და მისი ვაჟის, მარიუს ბორგ ჰოიბის გასამართლებას გაუპატიურების ბრალდებით.