საქართველოს ექს-პრეზიდენტი მიხეილ სააკაშვილი აცხადებს, რომ მეგის ქარდავას პირადად არასდროს შეხვედრია და მისი არსებობის შესახებ მხოლოდ პრესიდან იცის. ამის შესახებ სააკაშვილი ფეისბუკზე წერს და უკრაინსკაია პრავდას სტატიას აზიარებს სათაურით "უკრაინაში სააკაშვილის უახლოესი მოკავშირე დააკავეს."

მეგის ქარდავა მიხეილ სააკაშვილის პრეზიდენტობის პერიოდში სამხედრო პოლიციის დეპარტამენტის უფროსი იყო. არსებობს შესაბამისი კადრებიც, რომლებზეც სააკაშვილი ქარდავასთან ერთად არის აღბეჭდილი.

ქართული მხარის მოთხოვნით ინტერპოლის წითელი ცირკულარით ძებნილი მეგის ქარდავა პროკურატურის შუამდგომლობის საფუძველზე უკრაინაში პირველ ნოემბერს დააკავეს.

საქმეები, რომელზეც მეგის ქარდავა იძებნებოდა

  • ე.წ. ციხის ბუნტის საქმეზე მისჯილი აქვს სამი წლით და ცხრა თვით თავისუფლების აღკვეთა;
  • პატიმართა წამების საქმეზე (ე.წ. ნავთლუღის სპეცოპერაციის საქმე) მისჯილი აქვს შვიდი წლითა და ექვსი თვით თავისუფლების აღკვეთა;
  • ე.წ კასრების საქმეზე მისჯილი აქვს ცხრა წლით თავისუფლების აღკვეთა;
  • მსჯავრდებული ბ.რ.-ს წამების საქმეზე მისჯილი აქვს სამი წლითა და ცხრა თვით თავისუფლების აღკვეთა;
  • პოლკოვნიკ სერგო თეთრაძის წამების საქმეზე მისჯილი აქვს ცხრა წლით თავისუფლების აღკვეთა.

ამჟამად ბრალი წაყენებული აქვს

  • სახელმწიფო სახსრების გაფლანგვის საქმე;
  • ელდარ ქობალიას, კობა მატკავას და მერაბ ყოლბაიას წამების საქმე;
  • საქართველოს შს სამინისტროს სამეგრელო-ზემო სვანეთის სამხარეო მთავარი სამმართველოს უფროსის მოადგილეობის დროს ჩადენილი მალხაზ არქანიას წამების საქმე;
  • ელბერდ კობერიძის თავისუფლების აღკვეთისა და წამების საქმე.