ოთხწლიანი დავის შემდეგ, სააპელაციო სასამართლომ ვეტერანთა სახელმწიფო სამსახურს გათავისუფლებული თანამშრომლის აღდგენა და მისთვის განაცდური ხელფასის სრულად ანაზღაურება დაავალა. დავით ცირამუას ინტერესებს სასამართლოში საერთაშორისო გამჭვირვალობა - საქართველო იცავდა, საქმის შესახებ ინფორმაციაც მან გაავრცელა.

სასამართლოს გადაწყვეტილებით, ვეტერანთა სახელმწიფო სამსახური ვალდებულია ცირამუას გათავისუფლების შესახებ ბრძანება გააუქმოს და მას დაახლოებით 100 ათას ლარამდე თანხა აუნაზღაუროს.

"ჩვენ მას ამ გადაწყვეტილების უკანონობის დამტკიცებაში დავეხმარეთ", - აცხადებენ საერთაშორისო გამჭვირვალობა - საქართველოში.

მათივე თქმით, დავით ცირამუა 1992 წლიდან საქართველოს თავდაცვის სამინისტროს სისტემაში მსახურობდა, იყო აფხაზეთის ომის მონაწილე, ვიცე პოლკოვნიკი, ხოლო 2013 წლიდან - საქართველოს თავდაცვის სამინისტროს ვეტერანთა საქმეების დეპარტამენტის უფროსის მოადგილე. 2014 წლის 16 მაისს ის, თავდაცვის სამინისტროში 22 წლიანი სამსახურის მიუხედავად, თანამდებობიდან რეორგანიზაციის მოტივით გაათავისუფლეს.

ვეტერანთა საქმეთა სახელმწიფო სამსახურში ამბობენ, რომ მათი უწყება 2014 წლის 23 იანვარს შეიქმნა და ყველა თანამშრომელი, დირექტორის გარდა, კონკურსის წესით შეირჩნენ, ცირამუას კი კონკურსში მონაწილეობა არ მიუღია.

"აღნიშნულიდან გამომდინარე სსიპ ვეტერანების საქმეთა სახელმწიფო სამსახური სააპელაციო სასამართლოს სარეზოლუციო ნაწილის გაცნობის და სამართლებრივი შეფასების შემდეგ გააკეთებს კომენტარს შემდგომი რეაგირების თაობაზე", - დასძენენ უწყებაში.

მასალაში ვეტერანთა სამსახურის კომენტარი დაემატა მისი მიღებისთანავე, 20:08 საათზე.