ევროკავშირის უმაღლესი წარმომადგენლის მიერ 14 აგვისტოს გამოქვეყნებული სამი ოფიციალური დოკუმენტის თანახმად, საქართველო არ არის იმ ქვეყნებს შორის, რომლებმაც ირანის წინააღმდეგ ევროკავშირის მიერ ივლისში მიღებული სანქციები გაიზიარეს.

"საბჭოს ამ გადაწყვეტილებას უერთდებიან ალბანეთი, ბოსნია და ჰერცეგოვინა, ისლანდია, ლიხტენშტაინი, მოლდოვის რესპუბლიკა, მონტენეგრო, ჩრდილოეთ მაკედონია, ნორვეგია და უკრაინა.

ისინი უზრუნველყოფენ, რომ მათი ეროვნული პოლიტიკა შეესაბამებოდეს აღნიშნულ გადაწყვეტილებას", — აღნიშნულია საბჭოს მიერ გავრცელებულ განცხადებაში.

ბრიუსელის მიერ ივლისის ბოლოს მიღებული შეზღუდვები სამ ძირითად მიმართულებას მოიცავს: უკრაინის წინააღმდეგ ომში მოსკოვისთვის ირანის მიერ გაწეულ სამხედრო დახმარებასა და ახლო აღმოსავლეთში ნაოსნობის საფრთხის შექმნას, თეირანის ბირთვულ პროგრამას და ქვეყანაში ადამიანის უფლებების მძიმე დარღვევებს.

ევროკავშირის მიერ ირანის სანქცირებაზე გამოქვეყნებული დოკუმენტების მიხედვით, სამივე გადაწყვეტილებას შეუერთდნენ კანდიდატი და პარტნიორი ქვეყნები: ალბანეთი, ბოსნია და ჰერცეგოვინა, მოლდოვა, მონტენეგრო, ჩრდილოეთ მაკედონია, უკრაინა, ისევე როგორც ევროპის თავისუფალი ვაჭრობის ასოციაციის წევრები — ისლანდია, ლიხტენშტაინი და ნორვეგია. საქართველო, ისევე როგორც სერბეთი და თურქეთი, სიებში არ ფიგურირებს. ევროკავშირმა მიესალმა პარტნიორი ქვეყნების გადაწყვეტილებას საერთო სანქციურ პოლიტიკასთან შეერთების შესახებ.

რას ითვალისწინებს ევროკავშირის მიერ მიღებული 3 გადაწყვეტილება?

24 ივლისის გადაწყვეტილებით, ევროკავშირის საბჭომ 2027 წლის 27 ივლისამდე გაახანგრძლივა სანქციები, რომლებიც ეხება თეირანის მიერ რუსეთის სამხედრო დახმარებას, ახლო აღმოსავლეთსა და წითელი ზღვის აუზში შეიარაღებული ჯგუფების მხარდაჭერასა და ნაოსნობისთვის საფრთხის შექმნას. ამავე გადაწყვეტილებით, შავი სიიდან ოთხი პირი ამოიღეს.

ევროკავშირმა სანქცირებულთა სიას დაამატა ექვსი პირი: ხუთი ირანელი მოსამართლე ( და ჰაკერი ნიმა სალეჰი. ევროკავშირის განმარტებით, მოსამართლეები პოლიტიკური დისიდენტებისა და აქტივისტების წინააღმდეგ რეპრესიულ სასჯელებს (სიკვდილით დასჯა, პატიმრობა, გაროზგვა) იყენებდნენ, ხოლო სალეჰი ხელისუფლებასთან დაახლოებული კიბერდაჯგუფება Ashiyane-ის დამფუძნებელია. სანქციები მოიცავს ევროკავშირის ტერიტორიაზე აქტივების გაყინვას, გადაადგილების აკრძალვასა და ფინანსურ შეზღუდვებს.

მესამე გადაწყვეტილება ირანის ბირთვულ პროგრამას უკავშირდება. ევროკავშირის საბჭომ სიიდან სამი პირი ამოიღო, ერთი ორგანიზაციის მონაცემები განაახლა, ხოლო დანარჩენი პირებისა და სუბიექტების მიმართ მოქმედი შეზღუდვები ძალაში დატოვა.