თბილისის საქალაქო სასამართლოში ე.წ საბოტაჟის საქმეზე პარტია ერთიანი ნეიტრალური საქართველოს წევრები დაიკითხნენ. ადვოკატ ომარ ფურცელაძის განცხადებით, გამოკითხულმა პირებმა განაცხადეს, რომ სისხლის სამართლის დანაშაულში "აგენტურული ჯგუფის მხარდამჭერები და თანამოაზრეები" არიან: კაია კალასი, ურსულა ფონ დერ ლაიენი, მარტა კოსი, კელი დეგნანი და CIA.

ფურცელაძის თქმით, ოპოზიციონერ პოლიტიკოსებს ბრალად ედებათ უცხო ქვეყნის მტრულ საქმიანობაში დახმარება, ერთიანი ნეიტრალური საქართველოს წევრებს კი "მტრულ ძალად და სახელმწიფოდ ამერიკის შეერთებული შტატები მიაჩნიათ.

"მტრულ სახელმწიფოდ ამერიკის შეერთებულ შტატებს მიიჩნევენ. საგამოძიებო უწყებას დაწყებული აქვს გამოძიება და აწარმოებს სისხლის სამართლის საქმეს 319-ე მუხლის, ანუ უცხო ქვეყნის მტრულ საქმიანობაში დახმარების ბრალდებით, ოპოზიციონერი პოლიტიკოსების წინააღმდეგ და ამ მტრულ ძალად და სახელმწიფოდ მიაჩნიათ ამერიკის შეერთებული შტატები. ეს ფაქტი დაადასტურა სამმა მოწმემ, რომელიც სასამართლოში იკითხებოდნენ.

დღეს მდგომარეობით, მათ სახელობითად ჩამოთვალეს ის ადამიანები, საერთაშორისო დიპლომატიური და პოლიტიკური თანამდებობის პირები, რომლებიც მიაჩნიათ დანაშაულებრივი ჯგუფის წევრებად, მათ შორის ერთ-ერთმა მათგანმა, ბატონმა ლევან ნიკოლეიშვილმა, სასამართლოს მისცა ჩვენება, რომ ამ აგენტურული ჯგუფის მხარდამჭერი და თანამოაზრე გახლდათ ურსულა ფონ დერ ლაიენი, კაია კალასი და მთხოვა პირადად, არ გამომრჩენოდა არავითარ შემთხვევაში, ქალბატონი მარტა კოსი. მას მიაჩნია, რომ სწორედ ეს ადამიანები არიან საერთაშორისო დანაშაულებრივი აგენტურული ქსელის წევრები, რომლებიც გეგმავდნენ და მონაწილეობდნენ ანტიქართულ მოქმედებაში და ამაში ხელს უწყობდნენ ადგილობრივი ქართველი ოპოზიციონერი პოლიტიკოსები.

სასამართლოს წინაშე გამოკითხულია სამი მოწმე და ესენი არ გახლავთ უბრალოდ რიგითი მოწმეები, ისინი არიან განმცხადებლები, რისი განცხადებების საფუძველზეც დაიწყო გამოძიება და ისინი ამბობენ, რომ ამ სისხლის სამართლის დანაშაულში, თუ საერთოდ სისხლის სამართლის დანაშაულია, მონაწილე ფიგურანტები არიან კაია კალასი, ურსულა ფონ დერ ლაიენი, მარტა კოსი და კელი დეგნანი. ასევე, ამ დანაშაულებრივი ჯგუფის წევრებად ისინი მიიჩნევენ CIA-ის, როგორც ერთ-ერთ მონაწილე ორგანიზაციას", — განაცხადა ომარ ფურცელაძემ.

შეგახსენებთ, დღეს, 14 ივლისს, თბილისის საქალაქო სასამართლოში ე.წ საბოტაჟის საქმეზე პარტია ნეიტრალური საქართველოს წევრები — ნანა კაკაბაძე, ბიძინა გიორგობიანი, ვატო შაქარიშვილი, გელა ნიკოლაიშვილი და ლევან ნიკოლაიშვილი დაიკითხნენ.

პროკურატურამ სწორედ ნეიტრალური საქართველოს საჩივრის საფუძველზე დაიწყო ოპოზიციონერი პოლიტიკოსების წინააღმდეგ სამართლებრივი დავა.

ცნობისთვის, 2025 წლის 8 ნოემბერს ცნობილი გახდა, რომ ე.წ საბოტაჟის საქმეზე ბრალი 8 ოპოზიციონერ პოლიტიკოსს აქვს წაყენებული — მიხეილ სააკაშვილს, გიორგი ვაშაძეს, ნიკა გვარამიას, ნიკანორ მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძეს და ბადრი ჯაფარიძეს.

ვის რა ბრალდება წარედგინა?

მიხეილ სააკაშვილი — საქართველოს სისხლის სამართლის კოდექსის 317-ე მუხლი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდების ფაქტზე;

ზურაბ გირჩი ჯაფარიძე და გიორგი ვაშაძე — საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლი, რაც საბოტაჟის და უცხო ქვეყნისათვის მტრულ საქმიანობაში დახმარებას გულისხმობს;

ელენე ხოშტარია — საქართველოს სისხლის სამართლის კოდექსის 318-ე მუხლის პირველი ნაწილი, 319-ე მუხლი და 321-ე პრიმა მუხლის პირველი ნაწილი, რაც საბოტაჟს, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარების ფაქტს გულისხმობს;

ნიკა გვარამია, ნიკანორ მელია, მამუკა ხაზარაძე და ბადრი ჯაფარიძე — საქართველოს სისხლის სამართლის კოდექსის 318-ე მუხლის პირველი ნაწილი, რაც სახელმწიფო საბოტაჟს გულისხმობს.