"კოალიცია ცვლილებისთვის" ერთ-ერთ ლიდერს, ელენე ხოშტარიას, რუსთავის N5 ქალთა დაწესებულებიდან კლინიკა "ვივამედში" გადაიყვანენ. აღნიშნული გადაწყვეტილების შესახებ სპეციალური პენიტენციური სამსახურის გენერალურმა დირექტორმა, გიორგი პატარიძემ განაცხადა.

მისი განმარტებით, პატიმრის გადაყვანა უახლოეს ორ დღეში იგეგმება, სადაც მას დამატებითი გამოკვლევები ჩაუტარდება.

"ჩვენ თანახმა ვართ, რომ მსჯავრდებული ხოშტარია გადავიყვანოთ სამოქალაქო სექტორის კლინიკაში. ეს არის სამოქალაქო სექტორის კლინიკა "ვივამედი", რომელთანაც პენიტენციურ სამსახურს გააჩნია ხელშეკრულება. და შესაბამისად, უკვე კლინიკა "ვივამედში" ქალბატონი მაკას და ქალბატონი ანას მეთვალყურეობით, მსჯავრდებული ხოშტარია გაივლის შესაბამის დამატებით კვლევებს... უახლოეს დღეებში, დაახლოებით ორ დღეში, დაახლოებით ორი დღის განმავლობაში ჩვენ შევთანხმდით, რომ მსჯავრდებული გადავა სამოქალაქო სექტორის კლინიკაში...", — განაცხადა პატარიძემ.

ელენე ხოშტარიას მკურნალობის კურსსა და სამედიცინო პროცედურებთან დაკავშირებით განმარტება გააკეთა მისმა ექიმმა, მაკა იოსელიანმა. ექიმის თქმით, კლინიკაში სრული დიაგნოსტიკა ჩატარდება და მკურნალობის შემდგომი ეტაპები მხოლოდ ამის შემდეგ დაიგეგმება. საჭიროების შემთხვევაში, პროცესში უცხოელი სპეციალისტებიც ჩაერთვებიან.

"ჩატარდება ყველა საჭირო კვლევა — ლაბორატორიული, ინსტრუმენტული. ჩატარდება, როგორც შევთანხმდით, ყველა იმ სპეციალისტის კონსულტაცია, ვისაც ჩავთვლით საჭიროდ. და მხოლოდ და მხოლოდ ამის შემდეგ, როცა ჩამოყალიბდება საბოლოოდ, გამოირიცხება ინფექცია, დაისმება დიაგნოზი, საერთაშორისო რეკომენდაციების შესაბამისად, დაიწყება მკურნალობა.

როგორც მითხრეს, მომცეს თანხმობა, თუკი გადაწყვეტილება მიღებული იქნება ჩვენს მიერ — ანუ ექიმების მიერ, რომ დაწყებული იქნეს ბიოლოგიური, დაავადების მამოდიფიცირებელი პრეპარატები. ოღონდ კიდევ ერთხელ ვიმეორებ, რომ ეს გაკეთდება მხოლოდ და მხოლოდ სრული კვლევის შემდგომ, ეს თერაპიაც დაიწყება "ვივამედის" კედლებში. ჩატარდება რამდენიმე ინექცია და მხოლოდ და მხოლოდ ამის შემდგომ გადაწყდება პაციენტის გადაყვანა სასჯელაღსრულების დაწესებულებაში. უცხოელი სპეციალისტების შესახებ თანხმობა მოგვცეს, რომ ამ მხრივაც ჩვენ შეზღუდულები არ ვიქნებით, არავითარ შემთხვევაში", — განაცხადა ელენე ხოშტარიას ექიმმა მაკა იოსელიანმა.

შეგქახსენებთ, დროას ლიდერის, ელენე ხოშტარიას ჯანმრთელობის გაუარესების შესახებ ინფორმაცია მისმა ადვოკატმა, შოთა თუთბერიძემ 17 ივნისს გამართულ ბრიფინგზე გაავრცელა. მისი თქმით, თურქი ექიმების შეფასებით, სათანადო მკურნალობის გარეშე, ელენე ხოშტარიას ჯანმრთელობას შესაძლოა, მიადგეს გამოუსწორებელი ზიანი და ვეღარ შეძლოს ეტლის გარეშე გადაადგილება.