ჟურნალისტმა ნანუკა ჟორჟოლიანმა ტელეკომპანია "ფორმულას" ეთერში განაცხადა, რომ საქართველოს მე-3 პრეზიდენტისგან იყო შემოთავაზება "ნაციონალური მოძრაობის" თავმჯდომარეობაზე, მაგრამ უარი თქვა. თუმცა, პარტიაში "თავს ხედავს იმ შემთხვევაში, თუ შეძლებს ენმ-ს რეორგანიზაციას და "თავიდან შექმნას".

"მომხრე ვარ არა რამის დამატების, არამედ პირიქით, ეფექტური უნდა გახდეს ის, რაც არის. მე ვფიქრობ, რომ პარტიას ჰყავს ძალიან კარგი თავმჯდომარე, ჩემზე ჭკვიანი, პოლიტიკურად ჩემზე გამოცდილი, ჩემზე ლამაზი და შესაბამისად, მე ვფიქრობ, რომ თინა ძალიან სწორი კანდიდატია. უბრალოდ აქ არის საუბარი იმაზე, ვის რა როლი ექნება. ანუ, თინა ძალიან კარგად წარმოადგენს პარტიას საგარეო ველზე, ძალიან მნიშვნელოვანია და არის. მაშინ როდესაც ხაბე ციხეშია და ეს ძალიან მტკივნეულია პარტიისთვის და ეს პარტიას ძალიან დაეტყობა, მნიშვნელოვანია შიდა ველზე ვინ იქნება პარტიის წარმომადგენელი და როგორი იქნება პარტიის წარმომადგენელი. მე ჩემს თავს ვხედავ იმ შემთხვევაში, თუ შევძლებ პარტიის რეორგანიზაციას, პარტიის თავიდან შექმნას", — განაცხადა ნანუკა ჟორჟოლიანმა.

10 ივნისს საქართველოს მე-3 პრეზიდენტმა, მიხეილ სააკაშვილმა სოციალურ ქსელში დაწერა, რომ "პარტიას სჭირდება გაცოცხლება, ფუნდამენტური განახლება და გააქტიურება და ამ მიზნით ერთობლივად შეთანხმდნენ, რომ პარტიის რეფორმირებისთვის შემოიერთონ ბრწყინვალე ნანუკა ჟორჟოლიანი და მისი შესანიშნავი გუნდი".

ჟურნალისტის ნანუკა ჟორჟოლიანი საქართველოს მე-3 პრეზიდენტის მიხეილ სააკაშვილის მიერ გავრცელებულ განცხადებას გამოეხმაურა იმასთან დაკავშირებით, რომ ის ენმ-ის გუნდს უერთდება. ჟორჟოლიანი სოციალურ ქსელში წერს, რომ "ფიქრის და მოლაპარაკების ეტაპზეა" და გადაწყვეტილება ჯერ არ მიუღია.