ჟურნალისტის ნანუკა ჟორჟოლიანი საქართველოს მე-3 პრეზიდენტის მიხეილ სააკაშვილის მიერ გავრცელებულ განცხადებას გამოეხმაურა იმასთან დაკავშირებით, რომ ის ენმ-ის გუნდს უერთდება. ჟორჟოლიანი სოციალურ ქსელში წერს, რომ "ფიქრის და მოლაპარაკების ეტაპზეა" და გადაწყვეტილება ჯერ არ მიუღია.

"მიშასგან მაქვს საინტერესო წინადადება, რაზეც პრინციპში უკვე დაწერა. ნაციონალურ მოძრაობაში უნდა მოხდეს რევოლუციური ცვლილებები. მთავარ ძალად ახალგაზრდები იქცნენ. რეგიონებში მუშაობა და დაპირისპირება პროპაგანდასთან, ახალი ინტერესების შექმნა, პოლიტიკური კინკლაობებიდან რეალურ საქმეზე გადასვლა, ისრების გასწორება მთავარი მტრისკენ.

რა ეტაპზე ვართ? მოლაპარაკების. წინადადება საინტერესოა, გამოწვევა გააზრებული მაქვს რომ არც ისე მარტივი იქნება, მაგრამ ასევე მგონია, რომ შანსია დიდი ცვლილებების.

მოკლედ, ფიქრის და მოლაპარაკების ეტაპია. შეხვედრების, სხვების მოსაზრებების მოსმენის ვაფასებ მიშას საჯარო განცხადებას, რომ დიდი ცვლილებებისთვის მზადაა. პირად საუბრებშიც ესაა მთავარი თემა. კარი გაეხსნათ ახალ სახეებს, ახალგაზრდებს, იდეებით და ახლებური ხედვებით, საქართველო დიდი ჭაობიდან სწორედ ახალგაზრდულმა ხედვებმა უნდა ამოიყვანოს. პარტია მეტად უნდა ენდოს მათ, როგორც თავის დროზე, მიშა ენდობოდა და ქვეყნის მართვის საჭეს აძლევდა. ახლაც ამის დროა, ახალგაზრდებმა უნდა შექმნან დღის წესრიგი. ამ ნაწილში ვაფასებ მიშას ნდობას.

დარწმუნებული ვარ, ამ ქვეყნის მთავარი რეფორმატორების პარტიის ძველ შემადგენლობას ყველაზე კარგად ესმის, რამდენად მნიშვნელოვანია ეს ახლა. როგორც კი მეტი დეტალი მეცოდინება ხომ იცით დაწერაა ვერავინ დამასწრებს, ნუ მიშას გარდა, — წერს ჟურნალისტი ნანუკა ჟორჟოლიანი სოციალურ ქსელში.

მანამდე საქართველოს მე-3 პრეზიდენტმა, მიხეილ სააკაშვილმა სოციალურ ქსელში დაწერა, რომ "პარტიას სჭირდება გაცოცხლება, ფუნდამენტური განახლება და გააქტიურება და ამ მიზნით ერთობლივად შეთანხმდნენ, რომ პარტიის რეფორმირებისთვის შემოიერთონ ბრწყინვალე ნანუკა ჟორჟოლიანი და მისი შესანიშნავი გუნდი".