პარლამენტის დეპუტატმა და ქართული ოცნების წევრმა დიმიტრი ხუნდაძემ განაცხადა, რომ მისი პარტიისთვის ნეპოტიზმი დამახასიათებელი არაა:

"მთელ გუნდში ორი ადამიანი თუ ერთმანეთის ნათესავი აღმოჩნდება ეს არ ნიშნავს იმას, რომ ნეპოტიზმით ან ნათესაური კავშირებით ყალიბდება გუნდი. ეს გამორიცხულია. ზოგადად ქვეყანა თავისი მოსახლეობის რიცხოვნობით იმდენად პატარაა, რომ, შეიძლება, ორი ან სამი ადამიანი აღმოჩნდეს ერთამენთის ნათესავი".

გუშინ, 24 ოქტომბერს, ქართული ოცნების ერთ-ერთმა ლიდერმა ზაქარია ქუცნაშვილმა, რუსთავი 2-ზე, გადაცემა არჩევანში, თამაზ მეჭიაურის თანამდებობაზე დანიშვნის ისტორია გაიხსენა. მისი თქმით, მიუხედავად იმისა, რომ მეჭიაურს "კორუმპირებული ჩინოვნიკისა" და "არასტაბილურის" იმიჯი ჰქონდა, პარტიაში ნათესაური კავშირის გამო დაასაქმა.

"გელა ხვედელიძეს და მამუკა არეშიძეს ვთხოვე, რომ ეს კაცი, მიუხედავად მისი წარსულისა, მიგვეღო და ჩაგვერთო პროცესებში. რატომ? თამაზ მეჭიაურის მამა და დედაჩემის დედა იყვნენ ალალი და-ძმა. ეს ნათესაური კავშირი მე, როგორც მთიელს მავალდებულებს ყველა მთიელზე ვიზრუნო. ბატონი ბიძინა ყოველთვის გვასწავლიდა, რომ ადამიანებს მიეცით შანსი, რომ სწორ გზაზე დადგნენ", - განაცხადა ქუცნაშვილმა არჩევანის ეთერში.