ირაკლი კობახიძემ ჟურნალისტებთან საუბრისას განაცხადა, რომ 2021-2024 წლებში მისი პარტიის თავმჯდომარეობის პერიოდში "გარე ძალებს ებრძოდა", რომლებიც ქვეყნის "ომში ჩათრევას ცდილობდა" და ამით ახსნა პარტიაში კორუფციის ფაქტები.

კობახიძის თქმით, შარშანდელი ივნისიდან კორუფციის ერთ ფაქტს თუ იპოვიან, მყისიერი რეაქცია ექნებათ და ამაზე თავადაა პასუხისმგებელი.

"როდესაც გარედან ამხელა მცდელობაა ომში ჩაგითრიონ, შანტაჟი განახორციელონ, ზეწოლა განახორციელონ, თან მეორე თავსატეხი გაქვს, რომ ქვეყნის შიგნით რაღაცებს ბოლომდე მიჰყვე, განა არ მეცალა, მაგრამ ამის რესურსი არ იყო, მაგრამ დღეს პასუხისმგებელი ვარ რაზე, რაც გუშინაც ვთქვი და დღესაც შემიძლია გავიმეორო, რომ ავიღოთ ბოლო შარშანდელი ივნისიდან პერიოდი. ივნისს რატომ ვამბობ, იმიტომ რომ ივნისში დასრულდა არსებითად საკადრო ცვლილებები საქართველოს მთავრობაში.

თქვენ შეგიძლიათ აიღოთ შარშანდელი ივნისიდან პერიოდი და ნახოთ კორუფციის ერთი ფაქტი თუ იქნება დაკავშირებული ზედა ეშელონის პოლიტიკოსებთან, როგორებიც არიან მაგალითად: პრემიერმინისტრი, მინისტრები, მინისტრის მოადგილეები, ერთ ფაქტს თუ ამოიღებთ კორუფციის, გპირდებით, რომ მყისიერად გვექნება უკომპრომისო რეაქცია ამ ყველაფერზე. პასუხისმგებელი ვარ, ანუ რაც ხდება შარშანდელი ივნისიდან," — განაცხადა ირაკლი კობახიძემ ბრიფინგზე.

შეგახსენებთ, ირაკლი კობახიძემ დღეს გამართულ ბრიფინგზე ქართული ოცნების საპატიო თავმჯდომარეს, ბიძინა ივანიშვილს პოლიტიკის გროსმაისტერი უწოდა და ქვეყნის წინაშე მის დამსახურებებზე ისაუბრა. კობახიძის განცხადებით, ბოლო პერიოდში გამართულ სატელევიზიო დებატებში გაჟღერებულმა გზავნილებმა მას საზოგადოების წინაშე საკუთარი პოზიციის გამოხატვისკენ უბიძგა.