ტრამპს რუსეთის დროშები შეაყარეს

ფოტო: AP Photo/J. Scott Applewhite

აშშ-ს პრეზიდენტი დონალდ ტრამპი კაპიტოლიუმში რესპუბლიკელ სენატორებთან ლანჩზე მიდიოდა, რა დროსაც მას რუსეთის დროშები შეაყარეს. შემთხვევა 24 ოქტომბერს მოხდა.

"ტრამპი მოღალატეა!", - ყვიროდა აქტივისტი რაიან კლეიტონი, რომელიც პოლიციამ ადგილზე დააკავა. ის კაპიტოლიუმში ჟურნალისტებთან ერთად იმყოფებოდა. თავად აშშ-ს პრეზიდენტმა მომხდარი არ შეიმჩნია ისე გაიარა.

"ეს პრეზიდენტი რუსეთის აგენტებთანაა შეთქმული", - დაკავებისას აგრძელებდა ყვირილს აქტივისტი, რომელიც მსგავსი ეპატაჟური საქციელის გამო არაერთხელ მოექცა ყურადღების ცენტრში. მიმდინარე წლის 24 ივლისს ის პრეზიდენტის სიძესა და ადმინისტრაციის მაღალჩინოსან ჯარედ კუშნერს რუსეთის დროშით მიუახლოვდა და მასზე ხელმოწერა სთხოვა.

კაპიტოლიუმში მომხდარ ინციდენტს პრეზიდენტის უსაფრთხოებაში დაშვებული ხარვეზის შედეგად მიიჩნევენ მიუხედავად იმისა, რომ მას არანაირი საფრთხე არ ემუქრებოდა. ნებისმიერი პირი, რომელიც კაპიტოლიუმის შენობაში შედის, მათ შორის მედიაც, მკაცრ შემოწმებას გადის მეტალოდეტექტორებზე.