6 წლის ინგლისელმა ბადი ბრეილიმ ძაღლის დაკარგვით გამოწვეული სევდა კეთილ საქმედ აქცია — მან ცხოველთა თავშესაფრებისთვის $15 ათასი შეაგროვა.

ბადის მშობლებმა დიდი სახლი ქალაქგარეთ 7 წლის წინ იყიდეს. მათ სამი შვილი და უამრავი ცხოველი ჰყავთ: 17 ქათამი, ორი ცხვარი, ორი თხა, ოთხი ცხენი, ოთხი იხვი, შინაური ღორი პერსი, კატა და ლეკვი მარლი. ფერმის ცხოველების აყვანა ოჯახმა სამი წლის წინ დაიწყო, როდესაც ბადის სელექციური მუტიზმის (შფოთვითი აშლილობა, რომელიც გარკვეულ გარემოში ლაპარაკს ართულებს) თერაპია სჭირდებოდა. ცხოველებთან ყოფნა ბადის ლაპარაკის პრობლემის დაძლევაში ეხმარება. ბადის თხები და დალმატინელი, სახელად ბროდი, განსაკუთრებულად უყვარდა, რომელიც 10 წლის ასაკში, სიმსივნით მოულოდნელად მოუკვდა.

ბადი თავის თხებთან, ბერტისა და ბელასთან ერთად.

ფოტო: Abbie Braley

ერთ შაბათ დღეს, 6 წლის ბადი ბრეილიმ საკუთარ ფერმაში ქველმოქმედებისთვის კამპანია დაიწყო. ბიჭი ფულს თავშესაფრის ცხოველებისთვის სათამაშოებისა და საწოლების საყიდლად აგროვებდა — ეს ყველაფერი კი მისი ძაღლის, ბროდის ხსოვნას ეძღვნებოდა.

ბადის მიერ ხელით დაწერილი პირველი აბრა, რომელიც მან ფერმაში, ქოლგის ქვეშ ჯდომისას გვერდით დაიდგა.

ფოტო: Abbie Braley

"ბროდი ჩემთვის განსაკუთრებული იყო, ყოველ ღამე ჩემთან ერთად ეძინა და ჩემზე ზრუნავდა. ის მსოფლიოში საუკეთესო ძაღლი იყო. ვფიქრობ, მას გაუხარდებოდა, რომ სხვა, უპატრონო ძაღლებს ვეხმარები. მეგონა, ცხოველებს მხოლოდ 10 საწოლს ვუყიდდი, მაგრამ ახლა ბევრად მეტს შევძლებ", — ამბობს ბადი.

ბადი და ბროდი 6 წლის წინ.

ფოტო: Abbie Braley

ბადი და ბროდი 8 აპრილს — ბროდის გარდაცვალებამდე ორი დღით ადრე.

ფოტო: Abbie Braley

პირველ დღეს ბადიმ $155 შეაგროვა. კამპანიის ასეთ წარმატებაში დიდი როლი ოჯახის პოპულარობამაც ითამაშა. ბადის დედამ, რომელიც უკვე წელიწადზე მეტია სოციალურ ქსელში ოჯახის ფერმერულ ცხოვრებას აზიარებს, ამის შესახებ პოსტი დაწერა, რის შემდეგაც უამრავ ადამიანს გაუჩნდა ქველმოქმედებაში ჩართვის სურვილი.

"ჩვენს ხასიათში არ არის ფულის თხოვნა, მაგრამ იმდენი შეტყობინება შემოვიდა იმ ადამიანებისგან, რომლებსაც გულწრფელად უნდოდათ ძაღლების დახმარება, რომ GoFundMe-ზე გვერდი შევქმენით", — ამბობს ბადის დედა.

სულ რამდენიმე დღეში ასობით ადამიანმა ფონდში $15 800-ზე მეტი ჩარიცხა.