"ბრძანებას არავინ გასცემდა, ეს სპონტანურად მოხდა", — ასე გამოეხმაურა პოლიციელის დღისადმი მიძღვნილ ღონისძიებაზე შს მინისტრი, სულხან თამაზაშვილი გორში პოლიციების მიერ 2 პირზე განხორციელებულ ძალადობას. მისი თქმით, "გორში მომხდარი ინციდენტი იყო ძალიან მძიმე შემთხვევა, თუმცა "საჭირო არ არის სიღრმეებში შესვლა".

"გორში მომხდარი ინციდენტი იყო ძალიან მძიმე შემთხვევა და ფაქტი, თუმცა დღეს ვთვლი, რომ საჭირო არ არის სიღრმეებში შესვლა. საზოგადოებამ ნახა, რომ სახელმწიფომ მკაფიოდ დააფიქსირა პოზიცია ამ ფაქტის მიმართ. სულ ეს არის, რაც შემიძლია დღეს ვთქვა. [...] ბრძანებას არავინ გასცემდა, ეს სპონტანურად მოხდა", — განაცხადა შს მინისტრმა, სულხან თამაზაშვილმა გორში პოლიციების მიერ 2 პირზე განხორციელებულ ძალადობაზე კომენტირებისას.

შეგახსენებთ, რომ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი პაპუნა ლოცულაშვილზე. აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება დაიწყო და 6 პოლიციელი დააკავა.