შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს ყოფილი უფროსი ირაკლი შაიშმელაშვილი თბილისის საქალაქო სასამართლოს გადაწყვეტილებას გამოეხმაურა და სასამართლოზე წარსადგენი საბოლოო სიტყვა სოციალურ ქსელში გამოაქვეყნა. შეგახსენებთ, რომ გუშინ, 7 მაისს, სასამართლომ ირაკლი შაიშმელაშვილი 4 ოქტომბრის საქმეზე დამნაშავედ ცნო და 2 წლით თავისუფლების აღკვეთა დაუსწრებლად შეუფარდა.

• მურთაზ ზოდელავას, პაატა ბურჭულაძეს, ირაკლი ნადირაძეს, პაატა მანჯგალაძეს და ლაშა ბერიძეს 7-7 წლიანი პატიმრობა შეეფარდათ

შაიშმელაშვილის თქმით, მის ადვოკატს, ნათია მეზვრიშვილს საბოლოო სიტყვის სასამართლოში წაკითხვის შესაძლებლობა არ მისცეს.

"დღეს დასრულდა ივანიშვილის სასამართლო და მურუსიძის "ნოტარიუსმა" სასჯელები ისე ჩამოარიგა, წარბიც არ შეუხრია.

სამწუხაროდ, ჩემს ადვოკატსაც კი არ მისცეს უფლება, ჩემი საბოლოო სიტყვა წაეკითხა სასამართლოში. ამიტომ, აქ გავაზიარებ.

P.S აუცილებლად მოვა დრო, როდესაც ყველა ამ ბინძური და უსამართლო საქმის შემსრულებელი სათანადო პასუხს აგებს", — წერს შაიშმელაშვილი.

გდდ-ს ოპერატიული დაგეგმვის სამმართველოს ყოფილი უფროსი სოციალურ ქსელში გავრცელებულ წერილში წერს, რომ ქართულმა ოცნებამ მას პოსტის დატოვება არ აპატია: "როგორ გავბედე მათ წინააღმდეგ წასვლა. იძულებული გამხადეს, დამეტოვებინა ქვეყანა. წამართვეს ყველაფერი, რაც მიყვარდა, რისიც მჯეროდა და რისიც მწამდა".

"ვთვლი, რომ არა მხოლოდ უფლება, არამედ ვალდებულებაც მაქვს, არ დაიკარგოს ერთი რიგითი მოქალაქის ხმა. ჩემი კონსტიტუციური უფლებების ფარგლებში — გამოვიყენო ყველა მშვიდობიანი და კანონიერი საშუალება, რათა ეს "ხელისუფლება" შეიცვალოს.

დიახ, ქართული ოცნება ერთხელ და სამუდამოდ უნდა ჩამოშორდეს საქართველოს — და ეს აუცილებლად მოხდება!

მხოლოდ სამშობლოს სიყვარულისა და ღირებულებების ერთგულებისთვის ყველას, ვინც ხმა ამოვიღეთ, სამშობლოს მოღალატეები და მტრები გვიწოდეს. ფაქტია და ეს თქვენ ყველამ ძალიან კარგად იცით, რომ მხოლოდ განცხადებების გამო დაიწყო ჩემი დევნა და აღიძრა საქმე "სასამართლოში" — იმ განცხადებების გამო, რომელიც არ შეიცავდა არანაირ კანონდარღვევას. ამ შემთხვევაში, ფაქტორი არის ის, რომ რეჟიმმა იგრძნო საზოგადოების გამოფხიზლდები საფრთხე, მარტივი ჭეშმარიტება. ადვილად და ყველასთვის გასაგებია, ჩემი მიმართვისა და მოწოდების მთავარი მოტივი იყო თანამშრომლობის მხრიდან დადებული ფიცის პატივისცემა, მისი დაცვა და საკუთარ მოქალაქეებთან დაპირისპირებაში არ შესვლა.

დღეის მდგომარეობით, ცნობილია, რომ არც ერთი მოძალადე და კანონდამრღვევი ძალოვანი და არც ერთი ე.წ. "ტიტუშკა" არ არის იდენტიფიცირებული, არათუ დასჯილი. ამ გარემოების ფონზე კი თქვენ, ბატონო პროკურორო და მოსამართლევ არად დაგიდევთ მორიგი ფალსიფიცირებული და "შეკერილი" საქმის განხილვა" — ვკითხულობთ ირაკლი შაიშმელაშვილის სასამართლოზე წარსადგენ საბოლოო სიტყვაში.