სომხეთმა და საფრანგეთმა ხელი მოაწერეს შეთანხმებას ჩრდილო-სამხრეთ მაგისტრალზე ბაგუშატის გვირაბის მშენებლობის შესახებ, რომელიც ირან-სომხეთის და საქართველო-სომხეთის სასაზღვრო მონაკვეთებს დააკავშირებს.

გვირაბის მშენებლობის შესახებ სომხეთის პრემიერმინისტრმა ნიკოლ ფაშინიანმა 5 მაისს, განაცხადა, მას შემდეგ, რაც პრეზიდენტ ემანუელ მაკრონის სახელმწიფო ვიზიტის დროს სომხეთსა და საფრანგეთს შორის რამდენიმე შეთანხმება გაფორმდა. ინფორმაციას სომხური მედია ავრცელებს.

მან აღნიშნა, რომ ეს ახალი ეტაპი იქნება არა მხოლოდ ჩრდილო-სამხრეთ გზატკეცილის მშენებლობისთვის, არამედ სომხეთში გზების მშენებლობის ხარისხის ახალი სტანდარტების

"როდესაც მე და პრეზიდენტ მაკრონმა პირველად განვიხილეთ ეს თემა, მე მას ვესაუბრე ჩვენს მოტივაციაზე. ჩვენ მუდმივად ვსაუბრობთ სხვადასხვა სფეროში ევროპული სტანდარტების დანერგვის აუცილებლობაზე, მაგრამ ჩვენ გვჭირდება კომპანიები, რომლებსაც აქვთ შესაბამისი ცოდნა და უნარები ამ სტანდარტების დანერგვისთვის. და ამ შემთხვევაში, ფრანგული სამშენებლო კომპანიების ჩართვა მაგისტრალის ამ მონაკვეთის მშენებლობაში, რაც თავის მხრივ ადგილობრივ კონტრაქტორებს მიიზიდავს, შექმნის მნიშვნელოვან შესაძლებლობებს ამ სტანდარტების სომხეთის ეკონომიკაში დანერგვისთვის", — თქვა მან და დასძინა, რომ ეს შესაძლებელი გახდა პრეზიდენტ ემანუელ მაკრონის პირადი ჩართულობის წყალობით.

ნიკოლ ფაშინიანმა დასძინა, რომ ჩრდილო-სამხრეთის მაგისტრალი ერთ-ერთი სუპერპროექტია, რომელიც ხორციელდება სომხეთში, ხოლო ბაგუშატის მონაკვეთი ყველაზე რთულია, რომელიც მოითხოვს განსაკუთრებულ უნარებს მისი მშენებლობისთვის.

"როგორც საფრანგეთი, ასევე პრეზიდენტი მაკრონი გვერდში უდგნენ სომხეთს და შეგვიძლია ვთქვათ, რომ ჩრდილო-სამხრეთის სუპერპროექტი უკვე იღებს ფორმას და ჩვენ წარმოვიდგენთ ნაბიჯებს, რომლებსაც გადავდგამთ ამ გზატკეცილის სრულად ექსპლუატაციაში გასაშვებად", — თქვა მან.

ეს გზა (ნაწილობრივ ახალი, ნაწილობრივ არსებულის გაფართოება) ირანიდან საქართველოს საზღვრამდე მანძილს 550 კმ-დან 490 კმ-მდე შეამცირებს, რაც დააჩქარებს სომხეთში გადაადგილებას და ქვეყნისთვის ახალ სატრანზიტო შესაძლებლობებს შექმნის