მას შემდეგ, რაც ფრონტის ხაზზე საკვებისა და წყლის გარეშე დარჩენილი უკრაინელი ჯარისკაცების ფოტოები სოციალურ ქსელებში გასაჯაროვდა, უკრაინის თავდაცვის სამინისტრომ მაღალჩინოსანი მეთაური დაითხოვა.

ერთ-ერთი ჯარისკაცის ცოლმა, ანასტასია სილჩუკმა, სოციალურ მედიაში გამოაქვეყნა ფოტოები, რასაც სკანდალი მოჰყვა. ფოტოებზე კარგად ჩანს ოთხი ფერმკრთალი და გამოფიტული ჯარისკაცი, რომლებსაც ნეკნები ემჩნევათ და მკლავები დაწვრილებული აქვთ.

ნათესავების თქმით, ჯარისკაცებმა 8 თვე გაატარეს იმ ტერიტორიის დაცვაში, რომელიც მდინარე ოსკოლის მარცხენა სანაპიროზე მდებარეობს. მათთვის საკვებისა და წყლის მარაგის მიწოდება მხოლოდ დრონებით ხერხდებოდა.

"ფრონტზე მისვლისას ბიჭები დაახლოებით 80-90 კგ-ს იწონიდნენ, ახლა კი დაახლოებით 50 კგ-ს იწონიან", — განაცხადა სილჩუკმა. როგორც ის აღნიშნავს, ერთ-ერთი მარაგის მიწოდების შემდეგ, ჯარისკაცებისთვის 10 დღის განმავლობაში საკვები აღარ მიუტანიათ. ისინი იძულებულები გახდნენ, რომ თავის გადასარჩენად წვიმის წყალი დაელიათ და თოვლი გაედნოთ.

"საკვების გარეშე ჯარისკაცებს 17 დღეც კი გაუტარებიათ. რაციაში არ უსმენდნენ, ან არ უნდოდათ, რომ მათთვის მოესმინათ. ჩემი ქმარი იხვეწებოდა და ყვიროდა, რომ საჭმელი და წყალი აღარ ჰქონდათ", — თქვა სილჩუკმა და აღნიშნა, რომ ეს ერთადერთი შემთხვევა არ იყო.

უკრაინის გენერალურმა შტაბმა განაცხადა, რომ მეთაური, რომელიც ჯარისკაცების საკვებით მომარაგებაზე იყო პასუხისმგებელი, ჩაანაცვლეს. ბრიგადამ აღიარა, რომ ლოჯისტიკური პრობლემები არსებობდა და განმარტა ისიც, რომ ჯარისკაცებისთვის საკვების მიწოდება მხოლოდ დრონებით იყო შესაძლებელი, რადგან ისინი მოწინააღმდეგის ფრონტის ხაზთან ძალიან ახლოს იყვნენ.

"ყველაფერი დრონებით კეთდება. რუსები დიდი ყურადღებას აქცევენ ჩვენ მიერ საკვების, ტყვიებისა და საწვავის მიწოდებას. ისინი ცდილობენ, რაც შეიძლება მეტი დრონი ჩამოაგდონ. ხანდახან ჩვენი ლოჯისტიკით უფრო დაინტერესებულები არიან, ვიდრე ჩვენი სამხედრო აღჭურვილობით", — განაცხადა პრესსპიკერმა.

უკრაინაში რუსეთის მიერ სრულმასშტაბიანი შეჭრის შემდეგ, ამ ორ ქვეყანას შორის ნაცრისფერი ზონა უფრო და უფრო იზრდება. ორივე მხარე იყენებს დრონებს დაზვერვისთვის, ასევე ჯავშანტექნიკისა და ქვეითების მიზანში ამოსაღებად. ფრონტის ხაზამდე მისაღწევად ჯარისკაცებს 10-15 კილომეტრის ფეხით გავლა უწევთ.

ბოლო თვეების განმავლობაში უკრაინა სულ უფრო მეტად იყენებს სახმელეთო უპილოტო რობოტებს ღია ტერიტორიებზე მარაგების მისაწოდებლად და დაჭრილი ჯარისკაცების გამოსაყვანად. რუსეთმა კი კუპიანსკის მიმართულებით მდინარე ოსკოლზე ხიდები გაანადგურა, რათა მარცხენა სანაპიროზე მყოფი უკრაინელი ჯარისკაცები იზოლაციაში მოექცია.

სილჩუკის თქმით, რაც პრობლემა გასაჯაროვდა, მდგომარეობა გამოსწორდა. "ახალი მეთაური ჰყავთ, რომელმაც დაგვირეკა და გვითხრა, რომ პრობლემა გადაიჭრა. ეს მართლაც ასეა. ჩემმა ქმარმა მომწერა, რომ ბოლო დღეებში უფრო მეტი ჭამა, ვიდრე ბოლო 8 თვეში ერთად", — დასძინა მან.

უკრაინის გენერალურმა შტაბმა განაცხადა, რომ საკითხის გამოძიება დაიწყო და ხელსაყრელი პირობების არსებობის შემთხვევაში, ჯარისკაცების ევაკუაცია დაუყოვნებლივ განხორციელდება.