პარლამენტის პირველმა ვიცესპიკერმა, გია ვოლსკიმ, ირაკლი კობახიძისა და ვოლოდიმირ ზელენსკის შეხვედრა შეაფასა. მისი განმარტებით, თბილისსა და კიევს შორის არსებული სირთულეების მიუხედავად, დიალოგის გაგრძელება აუცილებელია.

ვოლსკის თქმით, საქართველო უკრაინის მხარდაჭერას პოლიტიკურ დონეზე მუდმივად ახორციელებდა, მიუხედავად იმისა, რომ ქვეყანა სამხედრო კონფლიქტში ჩართვას ერიდებოდა. მან ხაზი გაუსვა, რომ საერთაშორისო ფორმატებში საქართველო ყოველთვის უკრაინის მხარდამჭერ რეზოლუციებს უერთდება და ქვეყანაში ათასობით უკრაინელი ლტოლვილისთვის განათლების ხელმისაწვდომობას უზრუნველყოფს.

"სუსტი შეკითხვაა: "თქვენ რაზე ელაპარაკებით? მაგასთან გაბუტული ხომ ხართ?" — ჩვენ არავისთან ვართ გაბუტული. უკრაინის მთავრობის, ხელისუფლების, პირადად, ზელენსკის აბსოლუტურად არაობიექტური, არაკორექტული შეფასების, დამოკიდებულების მიუხედავად, საქართველოს არასდროს შეუწყვეტია უკრაინისთვის დახმარება — პოლიტიკური დახმარება. სამხედრო დახმარების აღმოჩენა ნიშნავდა ომში ჩართვას, რასაც ისინი ითხოვდნენ, მაგრამ ეს არ ნიშნავს იმას, რომ ჩვენ არ ვილაპარაკოთ. ჩვენ უნდა ველაპარაკოთ ზელენსკისაც და კიდევ ერთხელ შევახსენოთ, რომ არ არსებობს რეზოლუცია, საერთაშორისო ფორმატი, სადაც საქართველო უკრაინის მხარდამჭერად არ გამოსულა. დაითვალეთ, დღემდე რამდენი ათასი უკრაინელი ბავშვი სწავლობს ქართულ სკოლებში თავის უკრაინულ განყოფილებებში, დაითვალეთ, რამდენი ასეული უკრაინელი სტუდენტი სწავლობს საქართველოში და ამის მიხედვით გავაკეთოთ დასკვნები. მე ვფიქრობ, თუკი ეს საკითხი შევახსენეთ ზელენსკის, არ იქნება ურიგო. ნაცვლად იმისა, რომ აქედან ელჩი გაეწვია და საქართველოსთან ამ კონფრონტაციაში შესულიყო, ძალიან ცუდი პროპაგანდა მიმდინარეობს მედიასაშუალებებში. რასაკვირველია, შეიძლებოდა მეტი პოზიტიური ურთიერთობა ყოფილიყო. საქართველო ნაწილობრივ ოკუპირებული ქვეყანაა. ესეც უნდა გაითვალისწინოს. მუდმივი მცდელობა იმისა, რომ საქართველო ჩართულიყო საომარ მოქმედებებში, რასაკვირველია, განაპირობებს იმ ძალიან რთულ ურთიერთობებს, რომელიც ჩვენ ჩამოგვიყალიბდა, მაგრამ ეს არ ნიშნავს, რომ ერთმანეთთან საუბრისთვის არ უნდა მოიცალონ და ხელი არ უნდა ჩამოართვან. მსოფლიო პოლიტიკა მაგით ხასიათდება — დღევანდელი დღე იცვლება ხვალინდელით, რომელშიც შეიძლება აბსოლუტურად სხვა სტრატეგიული მიზნები და ხედვები ჩამოყალიბდეს. იმედი გვაქვს, რომ უკრაინასთან ურთიერთობები პოზიტიური იქნება", — განაცხადა გია ვოლსკიმ (მის სიტყვას IPN ავრცელებს).

შეგახსენებთ, ირაკლი კობახიძისა და ვოლოდიმირ ზელენსკის შეხვედრა ერევანში, ევროპული პოლიტიკური გაერთიანების (EPC) მე-8 სამიტის ფარგლებში შედგა. ოფიციალური ინფორმაციით, შეხვედრა უკრაინული მხარის ინიციატივით მოეწყო და მას ორივე ქვეყნის საგარეო უწყების ხელმძღვანელებიც ესწრებოდნენ.

ცნობისთვის, EPC-ის ფორუმს დაესწრებიან ლიდერები ევროკავშირის 27 წევრი სახელმწიფოდან, აგრეთვე ალბანეთიდან, ანდორიდან, სომხეთიდან, აზერბაიჯანიდან, ბოსნია და ჰერცეგოვინიდან, კანადიდან, საქართველოდან, ისლანდიიდან, კოსოვოდან, ლიხტენშტაინიდან, მოლდოვიდან, მონაკოდან, მონტენეგროდან, ჩრდილოეთ მაკედონიიდან, ნორვეგიიდან, სან-მარინოდან, სერბეთიდან, შვეიცარიიდან, თურქეთიდან, უკრაინიდან და გაერთიანებული სამეფოდან.

ევროპული პოლიტიკური გაერთიანება (EPC) არის სამთავრობოთაშორისო ფორუმი ევროპის მომავლის შესახებ პოლიტიკური და სტრატეგიული დისკუსიებისთვის, რომელიც 2022 წელს, უკრაინაში რუსეთის სრულმასშტაბიანი შეჭრის შემდეგ დაარსდა.